Кулун тутар 24-25 күннэригэр Тула куоракка бүтүн Арассыыйатааҕы «Малая Родина — Сила России» иккис төгүлүн ыытыллар муниципальнай пуорум эрэгийэннээҕи түһүмэҕэ буолан ааста. Бу пуорум Арассыыйаҕа муниципальнай тэриллиилэр үлэлэрин тупсарыыга уонна сайыннарыыга туһуламмыт сыл ахсын ыытыллар тэрээһин.
Сахабыт сириттэн Сунтаар улууһун Хадан нэһилэгин баһылыга Андрей Оконешников уонна Өймөкөөн улууһун баһылыга Александр Оконешников кыттыыны ыллылар. Киэҥ далааһыннаах пуорум Арассыыйа араас муннуктарыттан олохтоох салайыныы баһылыктарын тирээн турар суолталаах боппуруостары дьүүллэһиигэ уонна сайыннарыы стратегиятын оҥорон таһаарыыга түмтэ.
Бэйэни салайыныыга анаммыт дириҥ суолталаах тэрээһиҥҥэ 16 эрэгийиэн кытынна. Пуорум чэрчитинэн “Региональные дни” туспа киэҥ бырагыраамалаах тэрээһин буолла. Олортон биирдэстэрэ «Здоровый и активный образ жизни» диэн тиэмэнэн ааста. Түмүктүүр түһүмэх муус устар 21-23 күннэригэр Москва куоракка буолара былааннанар.
Чөл олоҕу үөскэтиигэ кэлим ньыманы быһаарсыыга, дьон доруобуйатын көрүнэн чөл олох сиэригэр көҕүлүүр сыаллаах пленарнай мунньахтар, төгүрүк остуоллар, стратегическай сессиялар буоллулар. Бу манна үлэни сөптөөхтүк тэрийиини уонна тоҕоостоох боппуруостары ырытыы, уопут үллэстии тэрилиннэ. Ону тэҥэ бырайыактары оҥорон көмүскээннэр хас биирдии тэрээһин муниципальнай бэйэни салайыныы саамай суолталаах кыһалҕаларын быһаарыыга уонна быһаарыыны көрдөөһүҥҥэ ыытылынна.
Алена ИВАНОВА