Бэҕэһээ Дьокуускай куоракка «Азимут» гостиница конференц-саалатыгар олус истиҥ тэрээһин ыытылынна. Ол курдук, биһиги улууспутугар таһаарыылаахтык үлэлии турар «Корона» фирма салайааччыта Надежда Львова бырайыагынан оҕолорго аналлаах «Маайыс уонна эһэ» диэн дьоҕус кинигэ сүрэхтэниитэ буолла.
Бу кырачааннарга эрэ буолбакка, оҕо төрөппүтүн кытары ааҕарыгар сөп, олус үчүгэй уруһуйдардаах кинигэ биһиги урут сөбүлээн ааҕар уонна тэлэбииһэргэ көрөр «Маша и медведь» ойуулукпутунан тахсыбыт кинигэ. Аны туран бу кинигэҕэ баар уруһуй дьоруойдара биһиги ортобутугар баар дьоммут уобарастарынан уруһуйдаммыт. Холобур, кыысчаан эһэтэ Надежда Григорьевна аҕатын хаартыскатыттан түһэриллибит. Оттон Маайыс кыысчаан култуура эйгэтигэр үлэлиир Евдокия Сивцева оҕо эрдэҕинээҕи хаартыскатыттан ойууламмыт. Маайыс кыысчаан таҥаһа кытары Евдокия оҕо сылдьан сахалыы таҥастаах түспүт хаартыскатыгар баар оһуордара, киэргэллэрэ кытары үүт-үкчүлэр.
Бу ойуулары ким уруһуйдаабыта буолуой? Горнай улууһуттан худуоһунньук Снежана Милютина үлэлэрэ буолар.
Кинигэ ис хоһооно кырачааннарга ордук тиийимтиэ тылынан суруллубута кэрэхсэбиллээх. «Маша и медведь» остуоруйаттан Сунтаартан Сардаана Омукова-Тууйака тылбаастаабыт.
Кинигэ ис тутулун, таҥааһыныын Сунтаар кыыһа Лена Семенова оҥорбут. Оттон биллэн турар, кинигэ тахсыытыгар үгүс үп-харчы эрэйиллэр. Маны бу бырайыак ааптара Надежда успуонсардаан 1000 ахсаанынан бэчээттэнэн таҕыста.
«Азимукка» ыытыллыбыт кинигэ сүрэхтэниитигэр үгүс ыҥырыылаах ыалдьыт сырытта. Ол курдук, өрөспүүбүлүкэҕэ биллэр-көстөр дьон – блогердар, артыыстар, уо.д.а. Холобур, Сунтаартан төрүттээх, «Карина» диэн дьон кутун-сүрүн туппут киинэҕэ кылаабынай оруолу толорбут кыысчаан София Прибылых ийэтин кытары кэлэн ыалдьыттаан, санааларын үллэстэн бардылар. София кинигэни олус сэргээбитин эттэ, оҕолорго сахалыы кинигэни элбэхтик ааҕыҥ, оттон Надежда Григорьевнаҕа өссө да сонун бырайыактары киллэрэн, оҕолорго элбэх кинигэтэ таһаара туруҥ диэн баҕа санаатын улахан киһилии эппитэ олус истиҥник иһилиннэ.
«Маайыс уонна эһэ» кинигэ сүрэхтэһиитин түмүгэр Элгээйиттэн төрүттээх Хаарчаана Иванова минньигэс да минньигэс тордунан ыалдьыттары күндүлээтилэр.
Аны аҕыйах күнүнэн кырачааннарга анаммыт кинигэ Сунтаарга айаннаан кэлэн сүрэхтэниэҕэ.
Яина ВЛАСЬЕВА