Бүгүн, «Партизан» НАТК М.И.Герасимов аатынан Сунтаардааҕы санаторнай оскуола, норуокка биллэринэн «ойуур оскуолата» 70 сыллаах үбүлүөйдээх тэрээһинэ буолла.
Оскуола хара маҥнайгыттан тэриллиэҕиттэн оҕо доруобуйатын чэбдигирэригэр анаммыт буолан ойуур быыһыгар кэрэ көстүүлээх Бүлүү өрүс кытылыгар турар.
Үөрүүлээх күҥҥэ оскуола бэтэрээн үлэһиттэрэ, араас сылларга үлэлээбит учууталлар, үөрэнээччилэр көрсөн уруккуну-хойуккуну санастылар, эҕэрдэ тыл үтүөтүн эттилэр.
Элбэх оҕо доруобуйатын бөҕөргөппүт оскуола бэлиэ сылын элбэх ситиһиилээх көрсөр. Ол курдук, оскуола билиини биэрэрин таһынан оҕолор доруобуйаларын чэбдигирдэр, чөлүгэр түһэрэр. Улуус оскуолаларын иһигэр ыытыллыбыт үөрэнээччилэр спартакиадаларыгар оҕолор эт-хаан өттүнэн бэлэмнээхтэрин көрдөрөн оскуола уопсай түмүккэ 2 үрдэл буолбута. Ол аата оскуола оҕолору эт-хаан өттүнэн кыанар буолалларыгар сүрүн болҕомтотун туһаайар. Бу аҕыйах ахсааннаах үөрэнээччилээх оскуолаҕа улахан ситиһии.
Бииртэн биир талааннаах оҕолор сценаҕа тахсан эҕэрдэ нүөмэрдэрин биэрдилэр. Ырыа-үҥкүү эйгэтигэр оскуола үөрэнээччилэрэ эмиэ талааннаахтарын, ситиһиилээхтэрин көрдүбүт.
Урукку сылларга оскуолаҕа өрөспүүбүлүкэ араас муннугуттан кэлэн доруобуйаларын чэбдигирдээри элбэх оҕо үөрэх-билии сомсубуттара. Санаторнай оскуола атын оскуолалартан уратытынан оҕолор манна үрдүгэр олорон үөрэнэллэр. Кинилэри үрдүк таһымнаах үлэһиттэр, учууталлар көрөллөр-истэллэр. Ол курдук, оскуолаҕа ЛФК, массаж кабинеттара, оҕо оонньуур, сынньанар хосторо, ону таһынан, тыыннаах муннук эмиэ баар. Туус хоһун үлэһиттэр бэйэлэрин күүстэринэн оҥорбуттар. Барыта оҕо доруобуйатын туһугар ананар.
«Ойуур» оскуолатын иитиллээччилэрэ үөрэммит кэмнэрин олус истиҥник ахталларын көрдүм. Иитээччилэрин ийэбит кэриэтэ көрөөччүбүт диэн бэлиэ күҥҥэ билиннилэр. Оскуолаҕа алын кылаастарга үөрэммит Алена Сергеева билии биэрбит оскуолатыгар махтанан туран бэйэтин дьиэ кэргэнин аатыттан видео, ырыа устуутугар, үйэтитиигэ диэн сертификат туттарда. Бу курдук бииртэн биир кэрэ, махтал тыллар этилиннилэр. Үлэһиттэр сыралаах үлэлэрэ сыаналанан араас наҕараадаҕа тигистилэр.
Маны таһынан, үбүлүөйдээх тэрээһиннэрин чэрчитинэн оскуола алын кылаас учууталларыгар улуустааҕы сэминээр тэрийэн ыытта. Сэминээр ис хоһоонунан оҕону үөрэх кэмигэр чэбдигирдии диэн. Манна санаторнай-оскуола учууталлара өр сыллаах опыттарын, бэйэлэрин билиилэрин-көрүүлэрин үллэһиннилэр, маастар-кылаастары ыыттылар.
Бу күн үлэһиттэр айар талааннарын көрдөрөр быыстапка элбэх дьон болҕомтотун тарта.
Мира АФАНАСЬЕВА
