Бүгүн, кулун тутар 30 күнүгэр, Ленин болуоссатын аллараа Бүлүү өрүскэ, Сунтаар сэлиэнньэтэ төрүттэммитэ 260 сылыгар аналлаах нэһилиэк холбоһуктаах хамаандаларын икки ардыларыгар 6-с төгүлүн ыытыллар Сунтаар нэһилиэгин баһылыгын кубогын спартакиадатын иһинэн хайыһар эстафетата уонна «көрдөөх стартар» буолан аастылар.
Уопсайынан күрэскэ Сунтаар нэһилиэгин тэрилтэлэрин холбоһуктаах 9 хамаандалара кыттыыны ыллылар.
Хайыһар эстафетатыгар хамаандалартан иккилии эр дьон уонна дьахталлар кытыннылар. Эр дьон 1 килэмиэтир оттон дьахталлар 700 миэтэрэ сүүрдүлэр. Кыайыылаах хамаанданы уопсай бириэмэннэн быһаардылар.
Ол курдук хайыһар эстафетатын кыайыылаҕа «ЖКС» ХЭТ, «Туллукчаан» уһуйаан уонна Сунтаардааҕы гимназия холбоһуктаах хамаандата буолла. Иккис миэстэни 1-кы нүөмэрдээх Сунтаар орто оскуолатын, «Алмаасэргиэнбаан» уонна судприставтар холбоһуктаах хамаандалара ылла. Оттон үһүс миэстэҕэ ОДьКХ уонна «Ньургуһун» уһуйаан холбоһуктаах хамаандалара тигистэ.
Оттон «көрдөөх стартар» холбоон 6 араас көрүҥҥэ буоллулар. Хамаандалар бастакы кыттааччылара сүүрэн тийэн буурунан ойбон үүттүүр, ол кэннэ иккис кыттааччы бытыылкалаах сүүрэн тиийэн чааскынан ууннан бытыылкатын толорон баран төттөрү сүүрэн кэлэр. Үһүс кыттааччы салаасканнан төрдүс кыттааччыны соһон сүүрэн ойбону эргийэн кэлэр. Оттон бэһис уонна алтыс кыттааччы атахтарын холбоон сүүрэн кэлбиттэрин кэннэ сэттис кыттааччы куулунан ыстанан баран кэлээтин кытта бүтэһик киһи атаҕар мээчик кыбынан ойбону эргийэн кэлэр. Кыайыылааҕы эмиэ уопсай бириэмэннэн быһаараллар.
Ол курдук «көрдөөх стартар» түмүгүнэн күрэх кыайыылааҕа ОГПС №31, «Кыталык» уһуйаан, ГИМС уонна ОНД холбоһуктаах хамаандата буолла. Иккис миэстэҕэ тигистэ ИДьМ уонна УСЗН холбоһуктаах хамаандата. Оттон үһүс миэстэни ылла ОДьКХ уонна «Ньургуһун» уһуйаан холбоһуктаах хамаандата тигистэ.
Дмитрий ЫМЫЧАНОВ