Маар Күөл нэһилиэгэ улууска эрэ буолбакка өрөспүүбүлүкэҕэ, дойдуга биллэр күүстээх мадьыныларынан, ааттаах-суоллаах быһый дьонунан сураҕырар. Саха төрүт көрүҥнэригэр чуолаан многоборьеҕа, мас тардыһыытыгар, хапсаҕайга өрөспүүбүлүкэҕэ бастыҥнар ахсааннарыгар баар Алексей Соколов, Ньургун Петров, Алексей Михайлов уо.д.а. уолаттар үүнэн-сайдан тахсыбыт дойдулара буолар. Кинилэр бары кэриэтэ оскуола дьоҕус саалатыгар эрчиллэн, буһан-хатан ситиһии кынаттаммыттара. Маннык успуорт эйгэтигэр элбэх ситиһиилээх нэһилиэк тарбахха баттанар. Бүгүн, олохтоохтор үөрүүлэригэр саҥа, киэҥ-куоҥ, сырдык успуорт саалата нэһилиэккэ арылынна.
Бу успуорт саалатын олохтоох «ВИД» тутуу хампаанньата (салайааччы Семенов Н.Н.) Сунтаар улууһун үбүлээһининэн 2 сыл тутан үлэҕэ киллэрдэ.
Анатолий Григорьев Сунтаар улууһун баһылыга олохтоохтору бу үөрүүлээх түгэнинэн эҕэрдэлээтэ
«Маар Күөл нэһилиэгэ айылҕаттан күүстээх-уохтаах, дэгиттэр талааннаах дьонунан аатырар. Аан дойдуга, Арассыыйаҕа оҕолор үрдүк үрдэллэри дабайалларыгар тириэньэрдэр үлэлэрэ улахан суолталаах. Онон бу тутуу нэһилиэк олохтоохторугар сүдү бэлэх буолар. Тутуу «Алроса» хампаанньа улууска түһэрэр дивиденин үбүнэн тутуллан киирдэ».
Успуорт саалата оскуоланы кытта силбэһэ турар 2 этээстээх. Тутуу уопсайа 672 кв.м иэннээх. Доруобуйаларынан хааччахтаах дьон сылдьарыгар толору усулуобуйа олохтоммут. Тимир каркаска аныгы матырыйаалынан бүрүллүбүт.
Дьарыктанар дьоҥҥо раздевалка, суунар сир уонна туспа тириэньэрдэргэ хостор бааллар.
Бу күн Маар Күөл чулуу спортсменнарын ааттара элбэхтэ ааттанна. Үгүс спортсмен Маар Күөл оскуолатыгар физкультура учууталынан үлэлиир