Билигин дойду үрдүнэн дойдуһа ыччаты иитии сүрүн сорук буолар. Төрөөбүт дойдутун таптыыр, кырдьаҕаһы ытыктыыр, ааспыты ахтар, дойдутун устуоруйатын билэр үүнэр көлүөнэттэн үтүө дьон тахсара саарбаҕа суох.
Арассыыйаҕа Аҕа Дойдуну көмүскээччи, Саха сиригэр Ийэ Дойдуну көмүскээччи сылларынан , Улуу Кыайыы 80 сыллааах үбүлүөйүнэн, кулун тутар 13 күнүгэр В.И. Иванова аатынан Кэмпэндээйи политехническэй хайысхалаах орто оскуолатын кылаастарын икки ардыгар “Кыайыыга кынаттаабыт ырыалар” байыаннай-патриотическай ыйы түмүктүүр сэрии саҕанааҕы ырыа күрэһэ буолан ааста.
Кэнсиэри дириэктэри иитэр үлэҕэ солбуйааччы Н.Е. Кондратьева иилээн-саҕалаан ыытта. Дьүүллүүр сүбэҕэ КЦ “Сайдыы” култуура киинин дириэктэрэ А.Ф Тотонова, история учуутала П.М Попов, муусука учуутала Г.Е Пахомов үлэлээтилэр. Кэнсиэр оччотооҕу сэрии сылларын сэгэтэн, уостан түспэт харах уулаах ырыаларынан дьон кэрэхсэбэлин ылла.
Ырыа күрэһэр алын кылаастарга: 1 миэстэ иккис кылаас кэлэктиибэ (кылаас сал. К.А Григорьева) , 2 миэстэ бастакы кылаас (сал. Нь.М Иванова), 3 миэстэ уһуйаан иитиллээччилэрэ буоллулар (сал. муусука учуутала Пахомов Г.Е.). Орто уонна үрдүкү сүһүөххэ: 1 миэстэ алтыс кылаастар (салайааччы оскуола психолога А.Л Гурьева), 2 миэстэ тохсус кылаас кэлэктиибэ (сал. И.П Федорова), 3 миэстэ онустар (сал. саха тылын учуутала А.А. Ефимова) буоллулар. Кыайыылаахтар өйдөбүннүк кубогынан уонна граматонан наҕарадаланнылар. Күрэс быыһыгар үрдүгү кылаастар вальс үҥкүүлээн уонна оҕолор сэрии саҕанааҕы хоһооннору ааҕан, ырыаларынан ыллаан киэргэттилэр.
Ким да умнуллубат, туох да умнуллубат!
Ванесса ФЕДОРОВА, Кэмпэндээйи орто оскуолатын 7-с кылааһын үөрэнээчитэ