Улуу Кыайыы 80 сылын көрсө «Кыайыы Кыһыл Знамята» бүтүн өрөспүүбүлүкэтээҕи эстэпиэтэ тохсунньу ыйын 9 күнүгэр сахалартан бастакы Сэбиэскэй сойуус дьоруойа Фёдор Кузьмич Попов төрөөбүт-үөскээбит дойдутуттан — Мэҥэ Хаҥаластан Баатара нэһилиэгиттэн саҕаламмыта.
Олунньу 21 күнүгэр, Кыайыы Знамята Ньурбаттан Сунтаарбыт улууһугар тийэн кэллэ. Ол курдук, Кыһыл Знамяны туттарыы өрөгөйдөөх тэрээһинэ Ньурба уонна Сунтаар улуустарын кыраныыссатыгар — Ботомоойуга буолан ааста.
Тэрээһиҥҥэ улуус баһылыгын социальнай боппуруостарга уонна имиджевэй бэлиитикэҕэ солбуйааччы Альберт Иванов, улуустааҕы бэтэрээннэр сэбиэттэрин бэрэссэдээтэлэ Афанасий Васильев уонна ыччат отделын салайааччыта Трофим Иванов кыттыыны ыллылар.
Сунтаар дэлэгээссийэтэ Кыайыы Знамятын ньурбалартан ылан Элгээйи нэһилиэгэр тиийдэ.
Олохтоохтору кытары көрсүһүү Кыайыы 50 сылыгар Аҕа дойду Улуу сэриитин
кыттыылаахтарыгар анаан туруорбут монуменнарыгар буолла. Тэрээһиҥҥэ монумеҥҥа венок уурдулар уонна чуумпуруу мүнүүтэтэ ааста.
Ол кэннэ Кыайыы Знамятын П.Х Староватов аатынан Элгээйитээҕи орто оскуолатыгар күөрэччи тутан кэлэн оскуола үөрэнээччилэригэр үөрүүлээх линейка буолла.
Салгыы Знамяны күндэйэлэр «Аттаах тумул» мемориальнай комплексыгар көрүстүлэр.
Кыайыы Знамятын биһиги улууспутугар үөрэх кыһаларынан, нэһилиэктэринэн сырытыннарыахтара. Онтон олунньу 24 күнүгэр ыаллыы бырамыысыланнай улууспутугар Миирнэйгэ салгыы барыаҕа.
Дмитрий ЫМЫЧАНОВ