Арассыыйаҕа Аҕа дойдуну көмүскээччи, СӨ Ийэ дойдуну көмүскээччи, Сунтаар улууһугар С.А.Зверев-Кыыл Уола сылларын чэрчитинэн “Эр киһи күүстээх тыла” улуус эр дьонун, уолаттарын икки ардыларыгар “Кыайыы хоһооно” хоһоон ааҕыытын күрэһэ олунньу 20 күнүгэр Элгээйигэ “Оһуор” култуура киинигэр өрөгөйдөннө.
Тэрийээччилэр С.А.Зверев-Кыыл Уола аатынан фольклор түмэлэ, Уйбаан Нуолур аатынан модельнай бибилэтиэкэ, “Оһуор” култуура киинэ, Элгээйи олохтоох дьаһалтата. Күрэскэ 6 нэһилиэктэн Түбэй, Күүкэй, Кундэйэ, Кэмпэндээйи, Сунтаар уонна Элгээйи эр дьоно, кэнчээри ыччаттарбыт кэлэн сүргэлэрэ көтөҕүллэн кыайыы өрөгөйдөөх тарҕастылар. Эр дьон күрэс иннинэ С.А.Зверев-Кыыл Уола аатынан фольклор түмэлигэр тахсан алгыс ылыннылар, оһуокайга кыттыстылар. Алгыһы Б.Н.Андреев аатынан айылҕа түмэлин таксидермист худуоһунньуга Геннадий Гуляев оҥордо. Оһуокайы “Оһуор” култуура киинин методиһа Михаил Федоров таһаарда. “Эр киһи күүстээх тыла” күрэспитин саҥа талыллыбыт аҕа баһылыкпыт Аркадий Самойлов эҕэрдэ тылыттан саҕаланна.
Күрэс түмүгүнэн хас биирдии кыттааччы анал ааттарыннан наҕараадаланнылар, сэмэй бириистэринэн бэлэхтэннилэр. Ол курдук, “Айымньы айылгытын бастыҥнык арыйыы” анал аат хаһаайына Күндэйэттэн 11-с кылаас үөрэнээччитэ Сергей Имаев, “Уран тыллаах ааҕааччы” анал аат Кэмпэндээйиттэн Николай Герасимов, “Иэйиилээх ааҕааччы” анал аат Күндэйэттэн 11-с кылаас үөрэнээччитэ Сергей Петров, “Бастыҥ сцена көстүүмэ” анал аат Күүкэйтэн Дьулус Тимофеев (сал.Ангелина Евсеева), “Кэскиллээх ааҕааччы” анал ааты Элгээйи орто оскуолатын 2-с кылааһын үөрэнээччилэрэ Даниил Гурьев , Василий Игнатьев , “Ылыннарыылаах тыллаах ааҕааччы” бөлөҕө анал ааты П.Х.Староватов аатынан Элгээйитээҕи орто оскуола учууталлара, “Эр киһи күүстээх куоластаах” бөлөҕө анал аат Сунтаардааҕы 1-кы №дээх орто оскуолатын 7-с кылаас үөрэнээччилэрэ аҕаларынаан ыллылар, “Сахалыы сайдам саҥалаах ааҕааччы” бөлөҕө анал аат Элгээйитээҕи орто оскуола 7-с-8-с кылааһын үөрэнээччилэрэ, “Дьүүллүүр сүбэ биһирэбилэ” анал аат Элгээйи орто оскуолатын 10-с кылааһын үөрэнээччитэ Арылхан Солдаткин , “Кыайыыга дьулуур” анал ааты Күндэйэттэн 6-с-7-с кылаас үөрэнээччилэрэ Ярослав Васильев , Виктор Макаров ыллылар.
Күрэс түмүгүнэн 1-кы үрдэли П.Х.Стараватов аатынан Элгээйитээҕи орто оскуола 8-с-10-с кылааһын үөрэнээччилэрэ (сал.Эльвира Николаева), 2 үрдэли Күндэйэ орто оскуолатын 2-с-4-с кылааһын үөрэнээччилэрэ, (сал.М.Алена, К.Анна, М.Матрена), 3 үрдэл ону тэҥэ “Көрөөччү биһирэбилэ” анал ааты ылла Тубэйтэн 9-с кылаас үөрэнээччитэ Юрий Борисов (сал.Пелагея Слепцова) ылары ситистилэр.
Түгэнинэн туһанан күрэспитигэр күүс-көмө буолбут олохтоох урбаанньыттарбытыгар ИП Дмитрий Шологоновка,
ИП Алевтина Осиповаҕа, ИП Айталина Ивановаҕа, ИП Туйаара Ивановаҕа, П.Х.Стараватов аатынан Элгээйи орто оскуолата сал. Софья Игнатьеваҕа барҕа махтал, үгүрү-сүгүрү буолуохтун.
Саха эр бэрдин боотур кута,
Модун санаата, сытыы өйө,
Саха эр бэрдин күүстээх тыла,
Үрдүк өрөгөйгө туруоҕа!
Михаил ФЕДОРОВ