Кутанатааҕы «Алгыс» култуура киинигэр 2024 сыл Арассыыйаҕа — Дьиэ кэргэн, өрөспүүбүлүкэҕэ — Оҕо саас, Сунтаар улууһугар — Аҕам саастаахтарга ытыктабыл сылларын арыйар үөрүүлээх тэрээһин буолан ааста. Нэһилиэк аҕа баһылыга Николай Давыдов тэрээһиҥҥэ кэлбит дьону эҕэрдэлээтэ. 2023 сыл түмүктэрин таһаарда.
СӨ үлэ сылыгар ыытыллыбыт «Удьуор утума — дьиэ кэргэн идэтэ», «Сунтаар улууһун үлэ династията» диэн көрүү күрэстэргэ кыайыылаах үрдүк аатын ситиспит Изабелла, Егор Третьяковтар бэлиэтэннилэр. Кинилэргэ баһылык сибэкки дьөрбөтүн кытта, үрүҥ көмүс харысхалы туттарда. Ону тэҥэ, улуус «Кыһыл көмүс дьиэ кэргэттэрин» кинигэтигэр киирбит нэһилиэк биир ытык-мааны ыалыгар Розалия, Капитон Никифоровтарга эмиэ үрүҥ көмүс харысхал бэлиэтин туттарда.
Кутанатааҕы «Матери России» түмсүү Дьиэ кэргэн сылын аһыллыытыгар өр сыл бииргэ олорбут Илья, Зоя Поповтар, Аста, Ким Степановтар дьиэ кэргэттэрин эҕэрдэлээтилэр уонна анал бэлэхтэрин туттардылар.
СӨ Оҕо саас сылыгар төрөөбүт кырачаан төрөппүттэрин Мария, Федор Егоровтары эҕэрдэлээтилэр. Дьиэ кэргэн сылын чэрчитинэн И.И.Макарова-Толоон Туорааҕа «Таас Буурай бухатыыр» олоҥхону дьиэ кэргэнинэн ситиһиилээхтик аахпыт Надежда Максим Максимовтар, Анастасия Кирилл Александровтар, Сардаана Борис Егоровтар, Элизабетта, Алексей Потаповтар дьиэ кэргэттэрэ бэлиэтэннилэр. Тэрээһини Кутана нэһилиэгин ырыа куттаах дуэттара ылбаҕай ырыаларынан киэргэттилэр.
Тамара ОКОНЕШНИКОВА, Кутанатааҕы МР түмсүү салайааччыта,
«Алгыс» КК уус уран салайааччыта