Кутана нэһилиэгэр отчуоту СӨ доруобуйатын харыстабылын миниистирин бастакы солбуйааччыта Дмитрий Дмитриевич Сергин туруорда.
Ол иннинэ ыалдьыттар Кутана түмэлигэр сырыттылар.
Отчуоту истэ, санааларын үллэстэ элбэх киһи кэлбит.
Олохтоохтор доруобуйа харыстабылыгар үлэһит дьон тиийбэтин ыйдылар. Олохтоох каадырынан хааччыйыы кыһалҕатын быһаарыыга Сунтаар улууһун дьаһалтата, балыыһата Нерюнгри куоратын медиктэри бэлэмниир колледжын кытта икки өрүттээх дуогабар түһэрсибитин түмүгүнэн билигин бу үөрэх кыһатыгар 15 устудьуон целевойунан үөрэнэ сылдьалларын эттилэр. Сотору кэминэн үөрэхтэрин бүтэрдэхтэринэ тыа сиригэр фельдшерынан үлэлии барыахтара. Билигин медик хамнаһа үчүгэй таһымҥа таҕыста диэтилэр. Биир санаанан олохтоох каадыры бэлэмнээн таһаарыыга нэһилиэк бэйэтин иһиттэн эмиэ барыахтаах диэн түмүккэ кэллилэр.
Ил-Түмэн депутаттара Афанасий Постников уонна Андрей Николаев дьону долгутар элбэх ыйытыктарга хоруйдаатылар. Ону тэҥэ, кэлиҥҥи сылларга олохтоох дьон түөкүттэр угаайыларыгар киирэр буолбуттарын эттилэр. Маныаха, дьоҥҥо өйдөтүү-сэрэтии үлэтэ күүскэ барыахтааҕын бэлиэтээтилэр.
Кутанал Бүлүү өрүһү туоруур муосталар тутууларын ыйыттылар. «Инфраструктура для жизни» национальнай бырайыак иитинэн 2030с.диэри өрүһү, үрэхтэри туоруур муосталар баар буолуохтара диэтилэр.
Быйыл Кутанаҕа «Мегафон», «МТС» сибээстэрэ киириэхтэрэ.
Отчуоту истэ кэлбит дьон СӨ Бырабыыталыстыбатын тутаах үлэһиттэрэ тыа сиригэр миэстэтигэр тиийэн дьону кытта көрсөн кэпсэтэллэрин сэргииллэрин эттилэр.
Дьон отчуоттан тэттик санаата, этиитэ: «Сайдыы төрүөтэ тыа сириттэн саҕаланар», «Айылҕабытын харыстыахха», «Ийэ тылын билэр киһи киэҥ билиилээх», «Отчуокка дьиҥ чахчы барар үлэни кэпсээн…», «Кистээбэккэ аһаҕастык үлэ барыахтаах», «Отчуоттан сонун информацияны истэбит».
Мира АФАНАСЬЕВА
