Кулун тутар 30-31 күннэригэр Кутана нэһилиэгэр өр сылларга Кутана почтатыгар начальнигынан үлэлээбит, нэһилиэк хас да ыҥырыылаах дьокутаата, бильярд федерациятын салайсыбыт Иннокентий Иванович Спиридонов аатыгар улуустааҕы бильярд күрэһэ буолла. Икки күн устата ыытыллыбыт күрэскэ хас даҕаны нэһилиэктэн уопсайа 40-тан тахса киһи кытынна. Бильярды сэҥээрээччи, кэрэхсээччи көрөөччүлэр Кутанаҕа муһуннулар. Саастарынан үс бөлөххө арахсан тыҥааһыннаахтык киирсиини көрөөччүлэр, ыалдьааччылар кыраҕытык кэтээтилэр.
Түмүккэ бөлөх аайы кыайыылаахтар быһаарылыннылар. Маны сэргэ 13 анал бириис туттарылынна.
55 саастарыгар диэри:
I миэстэ – Григорьев Киирик (Кутана), II м. Потапов Алексей (Кутана), III м. Потапов Петр (Кутана), III м. Петров Клим (Бордоҥ).
55-65 саастаахтарга:
I м. Федоров Михаил (Кутана), II м. Винокуров Аким (Кутана), III м. Васильев Константин (Кутана), III м. Потапов Геннадий (Кутана).
65 саастарыттан үөһээ:
I м. Яковлев Владислав (Сунтаар), II м. Илларионов Валентин (Элгээйи), III м. Иванов Анатолий (Кутана), III м. Егоров Митин (Элгээйи).
«Саамай аҕам саастаах кыттааччы» анал бирииһи – бинокль (Дмитрий Семенович туруорбут бирииһэ) – 80 саастаах Иван Ивановка туттардылар. Оттон «Кыайыыга дьулуурун иһин» ааты Хороттон сылдьар Борис Кириллин ылла. Бу бирииһи Иннокентий Спиридонов аллар атаһа Спартак Григорьев туруорда. «Саамай күүстээх ыалдьааччы» анал ааты, Дмитрий Семенович туруорбут күүстээх фонарик бирииһин, Күүкэйтэн кэлбит утуйар уутун да умнан туран оонньууну кэтээбит ыалдьааччыга Валерий Андреевка биэрдилэр. «Саамай эдэр кыттааччы» дьоһун ааты Бордоҥтон сылдьар Клим Петров ылла. Киниэхэ Иннокентий Спиридонов атаһа Иванов Александр Саввич («1000 мелочей» маҕаһыын) туруорбут аккумулятордаах этибиэркэтин туттардылар.
Иннокентий Иванович үс уола Геннадий Потапов, Максим Максимов, Андрей Андреев үс анал бириис хаһаайынынан буоллулар.
Ити курдук Кутанаҕа буолбут улуустааҕы бильярд күрэҕэр 12 бириистээх миэстэни таһынан 13 анал бириис туруоруллан, үгүс кыттааччы илии тутуурдаах, өттүк харалаах бардылар.
Тэрээһин кэмигэр минньигэс астаах буфет үлэлээн, бүтүүтэ фуршет буолан дьон олус астынна.
Кыттааччылар, тэрийээччилэр маннык сэргэх тэрээһини ыытарга көмө буолбут дьоҥҥо-сэргэҕэ, Иннокентий Спиридонов доҕотторугар, Кутана нэһилиэгин дьаһалтатыгар, бильярд федерациятыгар, бары успуонсардарга махталлара улахан.
«Сунтаар сонуннара» хаһыат.