Бүгүн муус устар 12 күнэ — Космонавтика күнэ бэлиэтэнэр. 1961 с. Юрий Гагарин “Восток” космическай хараабылынан халлаан куйаарыгар көтөн киһи олоҕор биир историческай түгэн буолбута. Бу күнтэн ыла Космонавтика күнүн кыралыын улаханныын бары билэбит.
Сунтаар нэһилиэгин «Туллукчаан» оҕо сайдар киинэ кырачаан оҕо бары өттүнэн сайдыылаах буола улааталларыгар араас интэриэһинэй дьарыктары, тэрээһиннэри ыыталларын истэн билэбит. Оттон бэҕэһээ уһуйаан оҕолоругар сылын аайы ыытыллар «Космонавтика» нэдиэлэтин түмүктүүр олус ураты, сонун дьоро күнү ыыттылар.
Айар-тутар дьоҕурдаах үлэһиттэр биир сүбэнэн кэрэ көстүүлээх оҕо болҕомтотун тардар куйаар эйгэтин тэрийдилэр. Нэдиэлэ устата оҕо билиитин хаҥатар, сайыннарар сыаллаах космодром Байконур 70 сылыгар аналлаах киһи эрэ сөҕө көрөр оҥоһуктарын быыстапката тэрилиннэ. Куйаар дьоро күнүгэр улахан бөлөх оҕолоро «Космо-подиум» авангарднай, дьэрэкээн таҥас-сап таҥнан муода хааман көрдөрдүлэр. «Космо-кафеҕа» минньигэс ураты аһы астына амсайдылар.
Кырачаан киһи куйаар эйгэтин туһунан чиҥ билиитин олохтуурга олус бэрт тэрээһин буолла. Бу буоллаҕа иитээччи айымньылаах үлэтэ, төрөппүт кыһамньыта, оҕо астыммыт мичээрэ.
Алена ИВАНОВА