Илимниир нэһилиэгиттэн сэриигэ 23 киhи ыҥырыллан барбытыттан 13 киhи сэрии толоонугар дьоруойдуу охтубута. 10 киhи кыайыы-хотуу кынаттанан төрөөбүт дойдутугар эргиллибитэ. Сэрии саҕаламмытын хара маҥнайгы күнүттэн сэбиэскэй норуот бүтүннүүтэ, ол иһигэр Саха сирин, биһиги оройуоммут дьоно-сэргэтэ бүүс-бүтүннүү хаанымсах өстөөҕү төттөрү охсор өлөр-тиллэр охсуһууга туруммута. Кинилэр биир кэккэҕэ туран Ийэ дойдуларын, тапталлаах норуоттарын, дьоннорун, оҕолорун-урууларын иннилэригэр андаҕар биэрбит ытык иэстэрин чиэстээхтик толорбуттара. Олохторун толук ууран сэрии хонуутугар тыыннара быстыбыта, бэйэлэрин харыстаммакка дьоруойдуу охсуспуттара, сорохторо онно сырдык тыыннара быстыбыта, сураҕа суох сүппүттэрэ, көмүс уҥуохтара да көтөҕүллүбэтэҕэ…
Уоттаах сэриигэ Илимниир нэһилиэгиттэн Семенов Ипатий Алексеевич, Мохотчунов Николай Егорович уолунаан Мохотчунов Николай Николаевичтыын, бырааттыы Николай-1, Николай-2, Иван, Андрей Спировтар, бырааттыы Исай, Лаврентий Поповтар, бырааттыы Иван, Андрей Поповтар, Мурукучаев Павел Васильевич, Сахтыев Василий Никифорович, Федоров Николай Гаврильевич, Васильев Алексей Алексеевич уонна да атыттар ыҥырыллан барбыттара.
Илимнииртэн барбыт эр санаалаах хорсун дьоммут сэрии улахан кыргыһыыларыгар кыттыыны ылбыттара, сорохторо үйэ-саас тухары онно хаалбыттара.
Курскай тоҕойго киирсиигэ Нарбыков Гавриил Максимович «Ворошилов» аатынан холуоска үлэлии сылдьан 1942 с. бэс ыйын 26 күнүгэр ыҥырыллан барбыт уонна атырдьах ыйын 23 күнүгэр Орловскай уобаласка Ульяновскай туһаайыытыгар өлбүт. Ханна көмүллэн сытара биллибэт.
Ини-бии Георгий, Александр, Пантелеймон Иннокентьевич Поповтар үһүөн сэрии толоонугар охтубуттара.
Попов Лаврентий Васильевич 1921 с.т., бастакы хомуурга атырдьах ыйын 7 күнүгэр барбыт да, ханна да өлбүтэ биллибэккэ сураҕа суох сүппүт.
Попов Николай Васильевич (1907 с.т.) Илимнииргэ нэһилиэк сэбиэтин бэрэссэдээтэлинэн үлэлии сылдьан 1942 c. бэс ыйын 26 күнүгэр сэриигэ барбыт. Ол сыл ахсынньы 10 күнүгэр Калининскай уобаласка Сычевскай оройуонугар Васильки дэриэбинэҕэ көмүс уҥуоҕа хараллан баран, кэлин Тверь уобалаһын Зубцово куоратыгар баар бырааттыы могилаҕа көһөрүллүбүт.
Степанов Матвей Ананьевич, 1914 с.т., бастакы хомуурга атырдьах ыйын 7 күнүгэр 1941 с. ыҥырыллыбыт. Кини НКВД п\я 11 Маритуй станциятыгар Илин-Сибиир тимир суолугар сулууспалыы сылдьан 1943 с. өлбүт. Ханна көмүллүбүтэ биллибэт.
Чайнов Михаил Егорович (1895 с.т.) 1944 сыл бэс ыйын 29 күнүгэр ыҥырыллан барбыт, ол сыл алтынньытыгар өлбүт. Ханна көмүллүбүтэ биллибэт.
Васильев Алексей Алексеевич (1904 с.т.) 1942 с. бэс ыйын 26 күнүгэр сэриигэ ыҥырыллыбыт, 1944 с. өлбүт. Ханна көмүллэ сытара биллибэт.
Иванов Алексей Васильевич (1901 c.т.) бэс ыйын 26 күнүгэр ыҥырыллыбыт. 1097 сп.326сд. сулууспалаабыт. 1942 с. сэтинньи 27 күнүгэр сэриигэ дьоруойдуу охтубут. Смоленскай уобаласка Сычевскай оройуонугар иккис эрээт 26-с могилаҕа хараллыбыт.
Мохотчунов Николай Егорович (1903 с.т.) Сунтаар сельпотугар үлэлии сылдьан иккис хомуурга бэс ыйын 26 күнүгэр ыҥырыллыбыт уонна сураҕа суох сүппүт.
Японияны утары сэриигэ Семенов Иппатий Алексеевич кыттыыны ылан «За победу над Японией» мэтээллээх эргиллибитэ.
Фашистарга билиэн тутуллуу сорун-муҥун этинэн-хаанынан билбит биир бэтэрээммит Сахтыев Василий Никифорович буолар. Кини сэриигэ бастакы хомуурга барбыт. Улаханнык эмсэҕэлээн 1947 с. дойдутугар төннөн кэлбитэ. Олох хойукка диэри кинини бэтэрээн быһыытынан ахтыбаттар-санаабаттар эбит. Ол саҕанааҕы кэмҥэ билиэҥҥэ түбэспити «норуот өстөөҕө» курдук көрөллөрө. Ол ыарахан сэрии сылларыгар билбэт сиригэр туох-ханнык сылдьыбытын олох биирдэ да кэпсээбэккэ бараахтаабыт эбит.
Сэрииттэн кыайыы-хотуу кынаттанан эргиллибит буойун Васильев Егор Фёдорович (1914 с.т.) буолар. Кини сэрии саҕаланаатын кытта бастакы хомуурга түбэһэн Туруктанан сатыы барбыта. 149 мотострелковай полкаҕа сулууспалаабыт. Минометчигынан сылдьыбыт. «За боевые заслуги», «За победу над Японией» мэтээллэринэн уонна И.В.Сталин Махтал суругунан наҕараадаламмыт. 1946 с. демобилизацияланан эргиллибит. Егор Фёдорович эйэлээх олоххо кэлэн холкуоска, сопхуоска араас үлэни толорор, ыал буолан 8 оҕо аҕата буолбута. Эрдэ огдообо хаалан бэйэтэ оҕолорун улаатыннартаан, үлэһит гынаттаабыта. 1983 с. олунньу 13 күнүгэр орто дойду олоҕуттан туораабыта. Кини Саха АССР Үрдүкү Сэбиэтин Президиумун Бочуотунай грамотатынан 2 төгүл наҕараадаламмыт, Бочуот Дуоскатыгар тахсыбыт, 1976 с. НХСБ сылдьыбыт, сопхуос Бочуотун кинигэтигэр киирбит.
«Дьулуур» КСК үлэһиттэрэ