Улуу Кыайыы 80 сылынан, Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи сылларын чэрчитинэн үгүс тэрээһиннэр ыытыллаллар.
Бүгүн олунньу 18 күнүгэр «Абаҕа” түөлбэ КСК-гар доруобуйаларынан хааччахтаах дьон ортолоругар Бүлүү бөлөх улуустарын IX спортивнай-культурнай бэстибээлэ үөрүүлээх аһыллыыта буолла. Бэстибээлгэ Ньурбаттан, Үөһээ Бүлүүттэн, Бүлүүттэн 91 кыттааччы кэлбит.
Хамаандалар икки күн уопсайа 6 көрүҥҥэ бэйэлэрин күүстэрин, кыахтарын холонуохтара. Бүгүн буулдьанан ытыыга, национальнай остуол оонньууларыгар, корнхол, голбол көрүҥнэригэр күөн көрсүөхтэрэ. Ону тэҥэ, дьоҕуру көрдөрүүгэ ырыаҕа, хоһооҥҥо, үҥкүүгэ бастыҥнары быһаарыахтара. Салгыы бэйэ-бэйэлэрин кытта билсэн, сэргэхсийэн доҕордоһуу киэһэтэ тэриллиэҕэ.
Оттон сарсын остуол тенниһигэр уонна олорон эрэ волейболга күрэхтэһиэхтэрэ.
Алена ИВАНОВА