Кулун тутар 13 күнүгэр, Маар Күөл орто оскуолатын 10-с кылааһын үөрэнээччитэ Даяна Емельянова, төрөөбүт күнүн көрсө, «Красочный дебют» диэн бастакы уруһуй быыстапката буолан ааста. Нэһилиэк кулуубун дьиэтигэр айар эйгэни сэҥээрээччилэр, оҕо аймах, олохтоохтор тоҕуоруһа муһуннулар. Кэлбит дьону оскуола оҕолоро алгыстаах алаадьынан үөрэ-көтө көрүстүлэр.
Даяна уруһуйунан 11 сааһыттан үлүһүйэн туран дьарыктанар. Кыра сылдьан араас раскраскалары сөбүлээн кырааскалыыр эбит. Уруһуйдууругар өҥнөөх харандааһы, акварелы, гуаһы, маркеры сөбүлээн туттар. Билигин кыралаан акриловай кыраасканы боруобалаан саҕалаабыт. Быыстапкаҕа аниме персонажтара, дьон мэтириэтин уруһуйдара дэлэй. Биир дойдулахпыт Арассыыйа дьоруойун Дмитрий Егоров мэтириэтин уруһуйдаан Аҕа дойдуну көмүскээччилэр күннэригэр аналлаах, бүтүн Арассыыйатааҕы уруһуй күрэһигэр I истиэппэннээх лауреат буолбут. Дьоруой мэтириэтэ быыстапкаҕа эмиэ турда. Хас биирдии үлэ ураты уобарастаах, тус-туспа тыыннаах. Бу күн ыалдьыттарга араас оонньуу тэрилиннэ. Ону тэҥэ, уруһуйдьут маастар-кылаас көрдөрөн, кэлбит оҕолор тэҥҥэ уруһуйдаан астыннылар.
Даяна инникитин айылҕаны, дьон мэтириэтин маслянай кыраасканан уруһуйдуу үөрэниэн баҕарар. Оскуоланы бүтэрэн баран графическай дизайнер идэтигэр туттарсарга былаанныыр. «Бастакыттан сатаныа суоҕун сөп, кыһаллан, элбэхтик үөрэнэн мэлдьи уруһуйдуу сылдьыахха наада»- диэн Даяна уруһуйдуон баҕалаах оҕолорго сүбэлиир.
Ураты суолталаах күн, эдэркээн уруһуйдьукка төрөппүттэрэ, чугас доҕотторо, аймахтара, учууталлара, нэһилиэк баһылыга эҕэрдэ эгэлгэтин эттилэр, алгыс тылларын анаатылар. Быыстапка минньигэс астаах фуршетынан, оһуохайынан түмүктэннэ.
Кэскиллээх уруһуйдьут өссө да талаана арыллан, үүнэн-сайдан тахсарыгар баҕарабыт.
Алена ИВАНОВА