Сунтаар улууһугар Кэмпэндээйи тэтимнээхтик сайдар нэһилиэктэртэн биирдэстэрэ буолар. Ол курдук, кэккэ сылларга нэһилиэккэ федеральнай таһымнаах 3 тосхолунан үлэлэр олоххо киирэн нэһилиэк сайдыытын түстүүллэр. Ол курдук, 2024 сылга “Култуура” национальнай бырайыагынан “Сайдыы” КК үлэҕэ киирбитэ, “Куттала суох уонна хаачыстыбалаах айан суоллара” диэн тосхолунан Устье-Кэмпэндээйи өрөспүүбүлүкэ таһымнаах суолга күргэлэри саҥардыы үлэтэ барда. Быйыл сааскыттан “Хаарбах дьиэттэн көһөрүү” федеральнай тосхолунан 34 кыбартыыралаах 3 этэстээх таас дьиэ тутулла турар. Саҥа дьиэҕэ ааспыт үйэ 60-70 сылларыгар тутуллубут маһынан оттуллар 10 хаарбах туруктаах уопсай дьиэ олохтоохторо көһүөхтэрэ. Нэһилиэккэ маннык таас, толору хааччыллыылаах уопсай дьиэ бастакы буолар. Онон олохтоохтор саҥа дьиэҕэ көһөллөрүн долгуйа күүтэллэр.
Бэдэрээччит “Нит строй” хампаанньа өрөспүүбүлүкэҕэ хас да эбийиэги туппут ааттаах-суоллаах тэрилтэ буолар. Бу күннэргэ тутуу 80% силигэ ситэн турар. Тутууну хонтуруоллуур прорабы Айсен Никитины көрсөн кэпсэттибит:
«Уопсай дьиэ тутуутун бу саас саҕалаабыппыт. Сайын таас блоктарынан холлоҕоһун бүтэрбиппит. Күһүҥҥүттэн саҕалаан ис үлэтигэр киирбиппит. Билигин дьиэ эркинин тэҥнээн, түннүктэрин олордон хара үлэтин толору бүтэрэн турабыт. Бу күннэргэ сылаас биэриигэ ититиитин ситимин тардыы, балконнарын оҥоруу үлэтэ бара турар.
Үлэһиттэрбит ахсаана күн-түүн эбиллэр. Бу күннэргэ эбии үлэһиттэр кэлэллэрин күүтэбит».
Кэмпэндээйи нэһилиэгин баһылыга Александр Игнатьев эбийиэккэ тиийэн тутуу хаачыстыбалаахтык барарын көрөр-истэр. Тус бэйэтэ тутуу үйэлээх, саҥа дьиэҕэ олохтоохтор туох да кыһалҕата суох нус-бааччы олороллоругар баҕарар.
Тутуу матырыйаала кэмигэр кэлбэккэ, ардахтаах күн-дьыл туран, нэһилиэк киин сиртэн тэйиччи сытара эбийиэк кэмигэр киириитигэр бытаарыы таҕыста. Тутааччылар ахсынньы бүтүөр диэри эбийиэк ис үлэтин бүтэрэн кэлэр сыл саҕаланыыта олохтоохтор күлүүстэрин тутуохтара дииллэр. Онтон саас дьиэ тас өттүн оҥорууга үлэ барыаҕа. Оҕо былаһааккатын туруордахтарына саҥа уопсай дьиэ оҕо саҥатынан туолуоҕа.
Кэмпэндээйи нэһилиэгэ кэлэр сылларга саҥа оскуола-саад (90 миэстэҕэ оскуола, 25-кэ уһуйаан) уонна олохтоохтору ыраас уунан хааччыйар хочуолунай тутуутун былаанныыллар. Онон нэһилиэк олоҕо күөстүү оргуйар.
Мира АФАНАСЬЕВА
