Балаҕан ыйын 26 күнүгэр биир дойдулаахпыт биллиилээх поэт, драматург, суруналыыс, ССРС Суруйааччыларын сойууһун чилиэнэ, СӨ искусствотын үтүөлээх диэйэтэлэ, Сунтаар оройуонун бочуоттаах олохтооҕо Иван Гаврильевич Алексеев төрөөбүтэ 90 сылын туолла.
Бу күҥҥэ анаан Кэмпэндээйигэ библиотека-мусуой тэлгэһэтигэр тутуллубут саҥа былаһааккаҕа сэргэх киэһэ тэрилиннэ. Мустубут дьон бастаан суруйааччы олоҕун, айар үлэтин билистилэр. Манна эбии Сунтаар киин бибилэтиэкэтэ бэлэмнээбит тэттик киинэтэ сонуннук көһүннэ. Салгыы «Сир уустара» өрөспүүбүлүкэтээҕи лааҕырга кэлбит оҕолор бэтэрээн учуутал, СӨ култууратын үтүөлээх үлэһитэ Клара Степановна Тихонова салайыытынан поэт хоһооннорун дорҕоонноохтук аахтылар. И.Г. Алексеев төрөөбүтэ 90 сылыгар аналлаах улууска ыытыллыбыт хоһоон ааҕыытын күрэһин кыайыылаахтара улахан дьоҥҥо Лира Герасимова, оҕолорго Мичийэ Герасимова хоһоон аахтылар. Лира Анатольевна, элбэх оҕолоох эдэр ыал ийэтэ, бэйэтэ да, оҕолоругар да өйгө үөрэтэр хоһоонноох тэтэрээтигэр биир дойдулаахтарбыт суруйуулара эмиэ бааллар. Иван Гаврильевич драматург быһыытынан биллибит «Суоһалдьыйа Толбонноох» айымньытын саха тылын учуутала Нарыйа Кондратьева сиһилии билиһиннэрдэ. Бу киэһэ суруйааччы ырыа буолбут хоһооннорун Клара Тихонова, Анна Тотонова, оҕолор да, мустубут да дьон тыыннаах муусуканан доҕуһуоллатан ыллааннар, чахчы да сылаас күһүҥҥү нуһараҥ киэһэҕэ дьоро күнү бэлэхтээтилэр.
Татьяна МЕСТНИКОВА.
