Күүкэй нэһилиэгин култууратын үлэһиттэрэ Айыына Тимофеева, Светлана Сокольникова көҕүлээһиннэринэн «Күүкэй квиз» диэн интеллектуальнай оонньууларын Кэмпэндээйигэ ыыттылар.
Кэмпэндээйи «Сайдыы» култууратын киинин ыҥырыытын ылынан кыргыттар оонньууларын 3 нэһилиэк көхтөөх ыччаттарыгар анаан оонньоттулар. Ол курдук, Күүкэйтэн биир хамаанда, Түбэй Дьаархантан икки хамаанда, Кэппэндээйиттэн 3 хамаанда. Хамаандаҕа 4-түү киһи кытынна, бары тус-туспа остуолларга олорон араас ыйытыктарга хоруйдаатылар. Квиз оонньууга тэрийээччилэр Саха өрөспүүбүлүкэтин историята, саха литературата, сахалар олохторо-дьаһахтара, сахалыы киинэ, геральдика, Саха сиригэр олорор омуктар диэн тиэмэлэринэн ыйытыктары бэлэмнээбиттэр.
Күрэх түмүгүнэн, бастакы үрдэл Кэмпэндээйи бастакы “GifГас” хамаандата 56 баалы ылан кыайыыны ситистэ, 47,5 баалы ылан иккис үрдэл Кэмпэндээйи иккис “Маркол” хамаандата , онтон үһүс үрдэл 40 бааллаах Түбэй Дьаархантан ыалдьыттарбыт «Дуолан» хамаандата буоллулар.
Оонньуу кэннэ ыччат дьон минньигэс астаах остуол тула олорон сэһэргэстилэр, санааларын үллэһиннилэр.
Кэмпэндээйи дьонун-сэргэтин аатыттан Күүкэй нэһилиэгин култууратын үлэһиттэригэр кэлэн оонньуу оонньоппуттарыгар, кыттааччыларга барҕа махталбытын тиэрдэбит!
Ыччаты түмэр тэрээһиннэр өссө да буола турдуннар.
Евгения ЭВЕРСТОВА «Сайдыы» КК уус-уран салайааччыта