“Сир уустара” өрөспүүбүлүкэтээҕи үөрэтэр-чэбдигирдэр лааҕыр быйыл 4-с сылын үлэлиир. Лааҕыр Кэмпэндээйигэ баар урукку аатырбыт санаторий базатыгар сөргүтүллэн, оҕолорго анаан тэриллэн, күн бүгүн манна оҕо дьон сынньана, чэбдигирэ кэлэллэр.
Oҕолор араас хайысханан сайдалларыгар толору кыах бэриллэр. Ол курдук, «Живая планета» диэн хайысхаҕа оҕолор сири-дойдуну, уулаах сир көрүҥнэрин, сир үрүт араҥатын, мастары, о.д.а. үөрэтэллэр. Оттон спортивнай ориентированиеҕа хайаны сөпкө дабайарга, түһэргэ үөрэтэллэр, катамаранынан усталлар уонна араас көрүҥнэргэ күрэс былдьаһаллар. Маны таһынан манна ыллыырга үөрэтэллэр. Лааҕыр иһинэн баар КВН-ҥа сылдьаллар.Үлэһиттэр оҕолору Кэмпэндээйи биллэр бэлиэ сирдэринэн, Туустаах уонна Үөннээх хайаларга экскурсиялаталлар.Бу лааҕырга анал байыаннай дьайыы кыттыылахтарын оҕолоро босхо путёвканан сынньаныахтарын сөп.
Ону таһынан бу базаҕа улахан дьон эмиэ сынньаналлар. Ол курдук, манна кэлбит дьон эмтээх былыыгынан, туустаах уунан араас ыарыыттан эмтэнэр кыаҕы ылаллар.
Дмитрий ЫМЫЧАНОВ