Кэмпэндээйигэ олохтоох дьаһалта уонна үлэтэ суох буолуу киинин тэрийиилэринэн волонтер оҕолор ый устата үлэлээтилэр.
Үлэһит кыргыттар Сардаана Макарова, Лилия Тихонова, Эвелина Сымытова, Туйаара Прокопьева, Лина Иванова, Нарыйаана Пахомова аэропорт, ыһыахтыыр сирдэри бөҕү-сыыһы ыраастаатылар. Ол кэннэ олохтоох бибилэтиэкэ тэрийиитинэн түмэлгэ хомуйуллубут араас докумуоннары, альбомнары, хаартыскалары сканердаан көмпүүтэргэ киллэрдилэр. Манна урукку кэмҥэ илиинэн суруллубут кырдьаҕастар, сэрии, тыыл бэтэрээннэрин ахтыыларын, суруктарын, 70-с сыллартан хаалбыт оскуола пионердарын араапардарын, кылаастар альбомнарын, улууска бастакы ыстахаанабыс А.В. Евсеев, цеолиты чинчийбит учуонай-геолог К.Е. Колодезников пуондаларыгар харалла сытар үгүс докумуоннарын түһэрэн төрөөбүт дойдуларын устуоруйатын үйэтитиигэ сүдү кылааттарын киллэрдилэр. Оттон бу күннэргэ Сунтаардааҕы кииннэммит бибилэтиэкэттэн үлэлиэхтээх волонтер Саввинова Таисия куораттан тустаах тэрил кэллэҕинэ видеокассеталартан көмпүүтэргэ киирбит киинэ архыыбын сааһылыырга үлэлиэхтээх. Ити курдук Кэмпэндээйи үөрэнээччилэрэ сыл аайы волонтердаан сайыннарын туһалаахтык атаараллар. Түгэнинэн туһанан кыргыттарга үйэтитии үлэтигэр көмөлөрүн иһин махталбын тириэрдэбин.
Татьяна МЕСТНИКОВА,
бибилэтиэкэр, Кэмпэндээйи