“Кэлэр быыбарга турунабын”, – диэн Анатолий Григорьев иһитиннэрдэ

Сунтаар улууһун дьаһалтатын ааспыт сыллааҕы  үлэтин-хамнаһын билиһиннэрэр түмүктүүр отчуота  «Партизан» НАТК буолан ааста. Сунтаар улууһун баһылыга Анатолий Григорьев киирии тылыгар: «Төһө да дойдуга уустук, ыарахан кэмнэр бүрүкээн турдаллар, Сунтаар дьоно түмсүүлээхпитин, биир санаалаахпытын көрдөрдүбүт. Ааспыт сыл улууска хаһааҥҥытааҕар да элбэх тутуу барда. Ол аата Сунтаар сайдар, инникигэ эрэллээх”, – диэтэ.

Анал байыаннай дьайыы буола турар сиригэр улуус баһылыга Анатолий Григорьев көҕүлээһининэн нэһилиэк баһылыктара миэстэтигэр балаһыанньаны билсэн, биир дойдулаахтарыгар көмө илдьэр үгэстэннилэр. Бу холобуру атын улуустар эмиэ ылынан эрэллэр.

Сунтаар улууһа ыыппыт үлэтин-хамнаһын истэ толору саала дьон муһунна. Чуолаан Сунтаар нэһилиэгин олохтоохторо оскуола тутуутун, суол-иис, тыа хаһаайыстыбатыгар сыһыаннаах, куоракка айан бырайыаһа ыараханын уонна эдэр дьон олохсуйуутун туһунан долгутар ыйытыктарын биэрдилэр.

Абаҕа түөлбэтин олохтоохторо нэһилиэккэ соҕотох агрооскуоланан биллэр 2 №-дээх оскуола тутуутун туруорустулар. Ону тэҥэ, саҥа тутуллубут успуорт саалата дьарыктанар тэриллэринэн хааччыллытын сурастылар. Маныаха,  2 №-дээх оскуола нэһилиэк биир улахан оскуолатын кэннэ хапытаалынай өрөмүөҥҥэ иккис турар диэтилэр. Онтон, Абаҕа успуорт саалата “Үтүө дьыала” чэрчитинэн барбыт буолан тэрилинэн хааччыллыыта көрүллүбэтэх. Ол эрэн, бу өттүгэр үлэ барарын иһитиннэрдилэр. Олохтоохтор саҥа саалаларыгар араас тэрээһиннэри, көрсүһүүлэри ыыта туралларыгар баҕардылар. Үүммүт сылга Сунтаарга өрөспүүбүлүкэ таһымнаах тэрээһиннэр ыытыллаары тураллар. Маныаха, олохтоохтор Сунтаар киин уулуссалара, дьиэлэр тас көстүүлэрэ тупсарыгар санааларын эттилэр.

Норуот учуутала Олег Сосин этиитигэр Сунтаар улууһа өрөспүүбүлүкэҕэ тупсаҕай суоллардааҕынан аатырар диэтэ.

Ол эрэн, оҕолор Дьокуускай куоракка айанныылларыгар кэккэ ыарахаттары көрсөн тиийэллэр. Аҥардас оҕолор айаҥҥа 4 күннэрин сүтэрэллэр. Оҕо доруобуйатыгар, үөрэҕигэр улахан охсууну ылар. Онон араас күрэскэ кытта барар оҕолорго сөмөлүөккэ чэпчэтиилээх бырайыаһы олохтуурга санаатын эттэ. Бу этиини улуус дьаһалтата өрөспүүбүлүкэ таһымыгар таһаарыаҕын ыйда. Түмүккэ, Олег Константинович Анатолий Григорьевтан “Кэлэр быыбарга турунар санаалааххын дуо?”, – диэн ыйытыгар Анатолий Григорьев: “Улууһум олохтоохторун кытта элбэхтик көрсөбүн, кэпсэтэбин. Дьаҥ ыарыы туран, СВО саҕаланан сорох бырайыактарбын олоххо ситэ киллэрэ иликпин. Онон кэлэр быыбарга турунар санаалаахпын”, – диэн мустубут дьоҥҥо санаатын аһаҕастык эттэ.

Эдэр дьон олохсуйуутугар улуус баһылыга Анатолий Григорьев этэринэн ыччат дьоҥҥо куорат курдук усулуобуйа тэриллиэхтээх. Толору хааччыллыылаах таас дьиэлэр, үлэ миэстэтэ, сынньанар сирдэр баар буолуохтаахтар. Төһөнөн сайдыы барар да ирдэбил  эмиэ улаатар диир. Ол иһин, улуус дьаһалтата бу хайысхаҕа күүстээхтик үлэлиирин эттэ.

Биллэр уопсастыбанньык Надежда Львова Бүлүү өрүс экологиятыгар сыһыаннаах сытыы боппуруоһу көтөхтө.

Кини этэринэн өрүс киртийиитин чинчийэр анал лаборатория баар буолуохтааҕын уонна ыарахан эттиктэри быһаарар реагеннарынан хааччыйыы барыахтааҕын эттэ.

Сунтаар нэһилиэгин олохтоохторо биир санаанан улуус дьаһалтата ыыппыт 2024 сыллааҕы үлэтин-хамнаһын “биһириибит” диэн сыаналаатылар. Биири этиэххэ баҕарыллар, маннык кэпсэтиилэргэ санааларын этинэр дьон эдэримсийбиттэр.

Улуус инники дьылҕатыгар долгуйар, кыһаллар дьон баара үөрдэр.

Мира АФАНАСЬЕВА

Читайте дальше