Үгүс көрөөччү биһирэбилин ылбыт «Карина» киинэ тас дойдуларга премьералара ахсынньыттан саҕаламмыта. Ол курдук, Лос Анджелеска, Парижка, оттон бу соторутааҕыта Казахстан Алматы куоратыгар «Чаплин» кинотеатрыгар көһүннэ. Сүрүн оруолу толорооччу биир дойдулаахпыт Түбэйтэн төрүттээх София Прибылых дьиэ кэргэнинэн премьераҕа тиийдилэр. Казахстан дьоно-сэргэтэ ыалдьыттары аэропортан саҕалан олус истиҥник көрүстүлэр. Кырачаан артыыс София улахан куораттарга аан маҥнайгытын тиийэн, сэргээн, астынан сылдьар. Кини киинэ режиссера Марианна Сиэгэни кытта 4 сыл буолан баран бу күн көрүстүлэр.
Премьераҕа дойду элбэх блогердара, суруналыыстара, телевидениелара интервью ыллылар, хаартыскаҕа түстүлэр. Софияттан үксэ «хайдах маннык оруолгун арыйан итэҕэтиилээхтик оонньообуккунуй?”, “бөртөлүөттэн куттамматаҕыҥ дуо?” диэн ыйытык биэрэллэр эбит. Ону кыысчаан: “Мин бэйэм бэйэбинэн хайдах баарбынан оонньообутум. Айылҕаҕа сылдьарбын олус сөбүлүүбүн. Эбэлээх эһэбэр дэриэбинэҕэ Түбэйгэ сайылыыбын уонна сөтүөлүүбүн. Ол иһин ууттан куттамматаҕым. Бэйэм ыттаахпын, онон ыты кытта оонньуу үөрүйэхпин. Кинини наһаа сөбүлүүбүн, кини мин доҕорум. Бөртөлүөттэн эмиэ куттамматаҕым. Аҕам катастрофа мэдиссиинэтин киинигэр үлэлиир этэ, онон бөртөлүөтү мэлдьи көрө үөрүйэхпин. Кыра сылдьан хаста да көппүтүм, дьиэм үрдүнэн бөртөлүөттэр мэлдьи көтөллөр” диэн чопчу хоруйдуур.
Киинэ Казахстан олохтоохторун сүрэҕин долгутан бэрт ситиһиилээхтик ааста. Иккис күҥҥэ бөлөх Казахстан «Лидер» диэн спасательнай-волонтерскай тэрилтэтин кытта көрүстүлэр. Саха сирин спасателлэрин үлэтин билсэн сүбэ-ама ыллылар. Оттон бу күннэргэ Софиялаах салгыы Киргизияҕа айаннаатылар.
Алена ИВАНОВА