2014 сыллаахха сайын Өлүөхүмэ улууһугар, 4 саастаах кырачаан оҕо — Карина Чикитова халыҥ тыа ойууругар муммутун Сахабыт сирэ, аан дойду бары аймаммыта. Кыысчаан Найда диэн ытын кытта 12 күн устата тайҕаҕа сылдьан тыыннаах хаалар. Сүүһүнэн киһи көрдөөн Каринаны от быыһыттан булбуттара. Бу туһунан суруналыыс Виктория Габышева «Карина. 12 дней в тайге»диэн кинигэ суруйан таһаарбыта. Ол кэнниттэн хас да сыллааҕыта Дьокуускай аэропордун таһыгар, Карина түөрт атахтаах эрэллээх доҕорун кытта турарын пааматынньык оҥорбуттара. Билигин кыысчаан 14 саастаах, балетнай оскуолаҕа ситиһиилээхтик үөрэнэр.
Бу олоххо буолбут түбэлтэҕэ олоҕуран «Карина» диэн киинэ муус устар 11 күнүгэр улахан экраҥҥа сүрэхтэннэ. Режиссер — Марианна Сиэгэн, киинэҕэ биллэр артыыстар Вячеслав Лавернов, Мария Кычкина, Петр Баснаев уһулуннулар. Онтон сүрүн оруолга биһиги биир дойдулаахпыт Түбэйтэн төрүттээх София Прибылых оонньоото. Бу оруолга 328 оҕо сайаапка ыыппыт ол быыһыгар омуктар кытары баҕаларын биллэрбиттэр.
Евдокия, Николай Прибылыхтар Дьокуускай куорат олохтоохторо, икки оҕолоохтор, улаханнара Николя 9-с кылаас оттон София саха гимназиятын 1-кы кылааһын туйгун үөрэнээччитэ. Кини үөрэҕин таһынан фортепиано кылааһыгар утумнаахтык дьарыктанар. Ис киирбэх, үөрүнньэҥ, элбэх саҥалаах, сытыы-хотуу кыысчаан сайын аайы Түбэйгэ эбэлээх, эһэтигэр кэлэн сайылыыр. Бүлүү өрүскэ сөтүөлүүрүн, оҥоойуга, кумаарга аахайбакка дьэдьэнниирин, айылҕаҕа сылдьарын олус сөбүлүүр. Тыынар тыыннаахтары, чуолаан түөрт атахтаах Хана диэн доҕорун таптыырын этэр.
Киинэни көрбүт дьон харахтарын уутун туттуммакка биир тыынынан көрбүттэрин, кырачаан София оруолун итэҕэтиилээхтик оонньообутун сэргээбиттэрин туһунан кэпсииллэр. Биир дойдулаахпыт, кэрэчээн кыысчаан саҥа киинэ эйгэтигэр сүрэхтэниитинэн эҕэрдэлиибит. Саҥа сулус сандааран, күлүмүрдүү тыган, айар аартык арыллан истин диэн баҕа санаабытын тириэрдэбит.
Алена ИВАНОВА