Кириэстээх нэһилиэгэр тохсунньу 23 күнүгэр Платон Ойуунускай аатынан Судаарыстыбанай бириэмийэ лауреата, «Бочуот Знага» орден кавалера, Дьокуускай куорат уонна Кириэстээх нэһилиэгин бочуоттаах олохтооҕо Иван Григорьевич Спиридонов төрөөбүтэ 95 сылын туолар үбүлүөйдээх бэлиэ кэмигэр анаан научнай- практическай конференция буолан ааста.
НПК И.Г.Спиридонов аатынан Кириэстээх политехническай оскуолатыгар ыытылынна. Үөрүүлээх чааска оскуола дириэктэрин үөрэх чааһыгар солбуйааччы Парасковья Амбросьева, Сунтаардааҕы үөрэҕирии управлениетын начальнигын солбуйааччы Владимир Уаров. Оҕолор эҕэрдэ хоһооннорунан, ырыаларынан саҕаланна.
Иван Григорьевич олоҕун, үлэтин туһунан документальнай киинэ бэлэмнэммит. Кини сырдык мөссүөнэ, олорбут олоҕо, үтүө суобастаах, таһаарыылаах үлэтэ ыччат дьоҥҥо, төрөөбүт нэһилиэгин олохтоохторугар, таптыыр Сахатын сирин дьонугар холобур буолар. Салҕыы кыттааччылар 4 секциянан арахсан үлэлээтилэр. Барыта 18 оскуола, Сунтаар оҕо сайдар киинэ, 150 оҕо кытынна. 124 дакылаат ааҕылынна.
Оскуола музейын муннуга кини туһунан киэҥ матырыйааллаах быыстапка бэлэмнээтэ, оскуола остолобуойа минньигэс астаах буфет үлэлэттэ. Секциялар үлэлэрин биллэр экспертэр сыаналаатылар.
«Живая и неживая природа», «Экологические проблемы родного края», «Поклонимся героям», «Художественный перевод как средство диалога культур» секцияларга экспертар кыттааччылар дириҥ ис хоһоонноох дакылааттарын, чиничийии үлэлэрин, элбэх сэргэх иһитиннэриилэри, уус-уран ааҕыылары сэргии истибиттэрин бэлиэтээтилэр.
Евгений Тараяров дириэктэрдээх оскуола кэлэктиибэ үрдүк таһымнаах тэрээһини ыыттылар диэн кэлбит ыалдьыттар санааларын үллэһиннилэр. Бары да саҥа киэҥ-куоҥ, ыраас-сырдык оскуолаҕа дуоһуйа сынньанан, үлэлээн, санаа үллэстэн бардахтара.
Үөрэтэр-чинчийэр эйгэ кыттааччылара ылбыт билиилэрэ, үлэлэрэ олоххо туһалыы турдун.
Людмила ДАНИЛОВА