“Инникигэ хардыы”НПК- эдэр чинчийээччилэр кынат анньынан көтөр түһүлгэлэрэ

Бүгүн Сунтаардааҕы политехническэй лиссиэй интэринээт оскуолатыгар оҕолорго “Инникигэ хардыы” научнай-практическай конференция улуустааҕы түһүмэҕэ буолла. “Инникигэ хардыы” НПК оҕолор наука эйгэтигэр бастакы хардыыларын оҥороллоругар төһүү күүс буолар.  Быйылгы НПК 210 эдэр чинчийээччи кытынна. Саамай элбэх бырайыак  “Прикладной дизайн и декоративное прикладное искусство” диэн хайысхаҕа оҕолор тутан-хабан оҥорбут үлэлэрэ киирдэ. Тэрийээччилэр, экспердэр этэллэринэн, урукку кэмҥэ НПК Сунтаар эрэ нэһилиэгиттэн элбэх оҕо кыттар буоллаҕына, кэлиҥҥи сылларга тыа оскуолаларын оҕолоро чинчийии үлэтинэн күүстээхтик ылсан үлэлиир буоллулар.

Наталья Максимова Күндэйэ орто оскуолатын биологияҕа учуутала, “Инникигэ хардыы” НПК “Наука о земле” хайысхатыгар эксперт: “Мин “Инникигэ хардыы” НПК эксперт быһыытынан үлэлээбитим уонтан тахса сыл буолла. Сыллата оҕолор чинчийэр үлэлэрин таһымнара улаатан, кэпсиир дьоҕурдара сайдан иһэр. Буоларын курдук, “Наука о земле” секцияҕа элбэх үлэни көрдүбүт. Манна экология, география, геология, палеонтология хайысхалара уо.д.а. сир оҥоһуутун үөрэтэр үлэлэр киирдилэр. Мэлдьи Кэмпэндээйи оскуолатын үөрэнээччилэрэ сиртэн хостонор туһалаах баайдар, палеонтологияҕа олус үчүгэй ис хоһоонноох, кэскиллээх, интэриэһинэй үлэлэринэн кытталлар.  Күндэйэ оскуолата эмиэ сыллата “Инникигэ хардыы” НПК 8-10 оҕону чинчийии үлэтинэн кытыннарар. Улуустааҕы түһүмэх кэнниттэн кыттааччылар үрдүк таһымнаах араас НПК ситиһиилэммит түгэннэрэ элбэх. Мин көрүүбүнэн,  ордук хас да сыл чинчийиллибит, үөрэтиллибит бырайыактар, саҥаны арыйбыт, айбыт, толкуйдаабыт, баар кыһалҕалары быһаарбыт оҕолор  үлэлэрэ ситиһиилээх буолар”.

СПТЛ-И 7-с кылааһын үөрэнээччитэ Лена Герасимова Кэмпэндээйи сиригэр уотугар баар “Тумара” ураты харыстанар заповедникка ойуур бизоннарын олохсуйууларын үөрэппит. Бүгүҥҥү күн туругунан Саха сиригэр 335 ойуур бизона баар, олортон “Тумараҕа” 17 бизон ууһаан-тэнийэн айылҕаҕа көҥүллүк сылдьар эбит.

Дьаархан нэһилиэгин оскуолатын 8-с кылааһын үөрэнээччитэ Айтыын Кузьмин Франция куукунатын бүлүүдэлэрин сахатытан биэрбит. Ол курдук, кини “Утка конфи” диэн бүлүүдэҕэ Дьаархан күөлүгэр бултаммыт куһу  астаабыта ураты, хатыламмат амтаннаах буолбут , “Киш лорен” аатырбыт бөрүөк куурусса начыынын убаһа этинэн солбуйбут, “Болоньезе” соуһу эмиэ сахатытан  тыллаах саламаакка кубулуппут.

“Инникигэ хардыы” научнай-практическай конференцияҕа оҕолор саҥаны айбыттарын олоххо хайдах киллэриэххэ сөбүн толору көрдөрөллөр. Түбэй Дьаархан оскуолатын оҕото тыал күүһүнэн эргийэр уоту оҥорор тэрил айбытын кэпсээтэ. Баара-суоҕа бу тэрилгэ 60 эрэ солк. ороскуотурбутун сөҕө иһиттибит. Сиэйэ оскуолатын робототехника куруһуогун кырачаан иитиллээччилэрэ бастаан “лего” конструкторынан бурдук мэһийэр суоруна киэбин оҥорбуттар.

Онтон муотурунан үлэлиир суоруна дьиҥ бэйэтин араас чаастартан таҥмыттарын көрдөрдүлэр. Оҕолор бииртэн биир, чаҕылхай, саҥа, сонун үлэлэрин, чинчийиилэрин дьүүллүүр сүбэҕэ кэпсээтилэр.  Бу бырайыактартан 45 бастыҥ үлэлэри талан “Инникигэ хардыы” НПК өрөспүүбүлүкэтээҕи түһүмэҕэр тохсунньуга Дьокуускай куоракка ыытыахтара.

Мира АФАНАСЬЕВА

Читайте дальше