Бэҕэһээ Түбэй-Дьаархан орто оскуолатыгар Ньурба улууһун Акана орто оскуолатын учууталлара, оҕо түмсүүтүн чилиэннэрэ уопут атастаһа кэлэ сырыттылар. Күн бастакы аҥаарыгар аһаҕас уруоктар ыытылыннылар. Ол курдук, Акана оскуолатын учууталлара Михаил Васильев 4-с кылааска тулалыыр эйгэ, Лаура Неустроева 7-с кылааска физика, Степанида Аргунова 6-с кылааска аангылыйа тылын уруоктарын ыыттылар. Түбэй-Дьаархан оскуолатын учууталлара Жанна Кожина 8-с кылааска аангылыйа тылын, Соломаида Федорова 8-с кылааска физика, Татьяна Петрова 9-с кылааска обществознание, Любовь Титова 8-с кылааска саха тылын уруоктарын ыыттылар.
Оттон күн иккис аҥаарыгар ыалдьыттар Ыгыаттатааҕы С.А. Зверев-Кыыл Уолун түмэлигэр сырыттылар. Онтон Эдуард Иванов робототехникаҕа, Акана оскуолатын технологияҕа учуутала Анна Иванова таҥас быһарга маастар-кылаастары көрдөрдүлэр. «Бастыҥнар хамсааһыннарын» «Эрэл» уонна «Дьулус» оҕо түмсүүлэрин актыбыыстара көрсөн кэпсэттилэр, оонньоотулар.
Түмүккэ, төгүрүк остуол тула кэпсэтии буолла. Акана оскуолатын дириэктэрэ Екатерина Мигалкина оскуолатын үлэтин-хамнаһын билиһиннэрдэ. Учууталлар санаа атастаһан инники үлэлэрин торумнаатылар, бииргэ үлэлэһэргэ сөбүлэҥ барылын бигэргэтэн илии баттастылар.
Улуустааҕы үөрэх салаатын пресс-сулууспата