Кэмпэндээйитээҕи В.И. Иванов аатынан орто оскуола кэлэктиибэ, ийэ дэкээдэтин түмүгүнэн олохтоохторго олус сонун, сэргэх киэһэни тэрийдилэр. Саҥа тутуллубут «Сайдыы» култуура киинигэр «Ийэҕэ бэлэх» диэн ааттаах кэнсиэри сэргэ оҕо ийэтинээн кыттар «Икки сулус» күрэс буолла.
Дьон туһугар диэн тутуллубут сырдык улахан кулууппут үрдүк сыанатыгар, оҕолорбут бииртэн биир чаҕылхай нүөмэрдэри толорон, ыллаан-үҥкүүлээн ытыс хабыллыар диэри таһынныбыт. Урукку өттүгэр ханна да ыллаабатах, үҥкүүлээбэтэх, кистэнэ сылдьыбыт талааннары көрөн сөҕө махтайдыбыт. Бу учууталлар, кылаас салайааччылара, муусука учуутала Гаврил Пахомов, үҥкүү үөрэтээччи Лира Герасимова уонна, биллэн турар, төрөппүттэр көмөлөрүнэн күүстээх бэлэмнэнии үлэтэ барбытын түмүгэ буоллаҕа. Сана кулуупка үлэлии кэлбит хореограф Никита Семенов үрдүкү кылаас үөрэнээччилэригэр туруорбут «Эрчимнээх эдэр саас» үҥкүүтүн үгүс көрөөччү сэргээтэ.
«Икки сулус» күрэххэ барыта 8 ыал кытынна. Бу тэрээһин эмиэ сонун буолла, манна ырыа эрэ буолбакка хоһоону доргуччу ааҕыы, норуот ырыата, тойук, үҥкүү бааллар. Түмүккэ Эвелина Сымытова (11 кыл.) аҕатынаан Артур Геннадиевичтыын битиилээх үҥкүүнү толорон, кылаан кыайыылаах буолан Арассыыйа ийэлэрин түмсүүтүн салайааччыта Любовь Осипова анал бирииһин туттулар. Оттон Ньургун, Лира Анатольевна Герасимовтар “Бастыҥ норуот ырыата”, Айсен, Изабелла Прокопьевна Федоровтар “Нарын куолас”, Руфина, Элеонора Николаевна Прокопьевалар “Кылыһахтаах куолас”, Ростислав, Александра Николаевна Архиповтар “Хомоҕой хоһоонньут”, Аэлита, Ирина Яковлевна Лыткиналар “Кэскиллээх ырыаһыт”, Северина, Афанасия Ариановна Конобуловалар “Кэрэ куолас”, Арчын, Евгения Анатольевна Эверстовтар “Ырыа куттаах дьиэ кэргэн” ааттарга тиксэн, төрөппүт кэмитиэтэ бэлэмнээбит бириистэрин туттулар. Күрэх арыйыытынан Элеонора Прокопьева тойугун көрөөччүлэр дохсун ытыс тыаһынан бэлиэтээтилэр. Кэнсиэри Нарыйа Кондратьева иилээн-саҕалаан ыыппытын үгүс көрөөччү астына көрдө.
Тэрээһин кэнниттэн тэрийээччилэр, оҕолор санааларын иһиттим.
Гаврил Пахомов, муусука учуутала: «Кэнсиэрпитин эрдэттэн бэлэмнээбиппит. Муусука оҕоҕо инники олоҕор, үүнэн-сайдан тахсарыгар аһара наадалаах, кэрэҕэ-үтүөҕэ сирдиир, олоҕор биир төһүү күүс буолар. Ол иһин биһиги Сахабыт сирин бастакы бэрэсидьиэнэ Михаил Николаев «Муусука барыларыгар» бырайыага олус үчүгэй, кыах баарынан оҕолорбутун үөрэтэн-такайан, бу маннык саҥа, киэҥ-куоҥ кулууппутугар үлэлээн-хамсаан өссө да, инники диэки баран иһиэхпит».
Лира Герасимова, эбии үөрэхтээһин педагога: «Кэнсиэркэ барыта 24 нүөмэр бэлэмнэннэ. Манна урукку өттүгэр хаһан да ыллаабатах, үҥкүүлээбэтэх, хоһоон аахпатах оҕолор кытыннылар, туох сыыһа-халты баарын салайааччылар көрдүбүт, инникитин ону тупсарыахпыт, сайыннарыахпыт. Төрөппүттэрбит биһиги үлэбитигэр өссө да, күүс-көмө, өйөбүл буола турдуннар».
Сайаан Саввинов, үөрэнээччи: «Биһиги бу кэнсиэркэ кыттан, ийэлэрбитигэр анаан, оҕолор бэлэх уонна аккырыыкка туттардылар. Инники өттүгэр өссө да кэнсиэртэргэ кыттан иһиэхпитин баҕарабыт».
Стас Саввинов, үөрэнээччи: «Бүгүн наһаа үчүгэй кэнсиэр буолла. Кулууппут тутуллан улахан сайдыы, кэлэр көлүөнэлэр эмиэ манна туран ыллыахтара диэн эрэнэбин, итэҕэйэбин».
Валентин Гуринов, үөрэнээччи: «Бүгүн наһаа үчүгэй күн ааста, ыллаатыбыт, үҥкүүлээтибит. Саҥа кулууп тутуллан киирбитэ үчүгэй».
Күндүл Егоров: үөрэнээччи: «Куллуупут тутуллубута үчүгэй, бильярдыыбыт, теннистиибит. Үҥкүүлүүрбүт эмиэ үчүгэй, биһигини саҥа хореограф Никита Иванович үөрэтэлээтэ. Өссө да кэнсиэртэр буолалларын кэтэһэбит».
Ити курдук, үгүс учууталлар, үөрэнээччилэр баараҕай кулууп тутуллан, нэһилиэкпит култуурунай олоҕор, үүнэр ыччаттарбыт сайдалларыгар бары өттүнэн төһүү күүс буоларын ыйдылар. Бу киэһэ буолбут тэрээһин ону толору көрдөрдө.
Татьяна Местникова, бибилэтиэкэр