Б.Н Егоров аатынан Күндэйэ орто оскуолата төрүттэммитэ 105 сылын бэлиэтии ыраахтан-чугастан элбэх ыалдьыты түмтэ. Үбүлүөйү оскуола гиминэн үөрүүлээхтик астылар, оскуола дириэктэрэ О.Ю. Лазарева, нэһилиэк дьаһалтатын баһылыга И.В.Константинов кэлбит ыалдьыттарга, учууталларга, оҕолорго туһаайан эҕэрдэлэрин эттилэр. Ол кэнниттэн оскуола иккис этээһиттэн саҕалаан хас да бөлөххө үллэстэн кылаастарга киирэн учуутал оҕолордуун бэрт үчүгэй киһини тардар дьарыктары, уруоктары, викториналары, илиинэн айан оҥоһуктарга маастар-кылаастары биэрдилэр.
Оскуола бырааһынньыктыы симэнэн, араас кэм историятын кэпсиир стендэлэр элбэхтэрэ, ааспыт кэминээҕи пионерскай, комсомольскай олоҕу сырдатар ретро муннуктар чахчы да оҕо сааспыт үтүө өйдөбүлүгэр төннөрөн ылла. Кэлбит ыалдьыттар учууталлар уруоктарыттан астынан, махтаннылар. Киирии саалаҕа мустан “Ахтан-санаан ааһыаҕыҥ” диэн араас кэмҥэ оскуоланы бүтэрбит көлүөнэлэр иһирэх көрсүһүүлэрэ уонна саастаах дьонтон саҕаланан эдэр оҕолорго диэри бэйэлэрин үөрэммит учууталларыгар сүгүрүйүү, иитиллибит кыһаларыттан хаһан эрэ кэрэҕэ-сырдыкка, билиигэ көччөх гынан көтүппүт оскуолаларыгар махтанан туран, сэмэй бэлэхтэрин үөрэ-көтө туттардылар.
“Ил” култуура киинигэр аныгы сибээс өҥөтүнэн туһанан тас дойдуга олорор дьоммут истиҥ эҕэрдэлэрэ, өоөспүбүлүкэ араас муннуктарыгар ситтиһиилээхтик үлэлии сылдьар ыччаттарбытын көрөн үөрүүбүт өссө үрдээтэ.
Бу үөрүүлээх күҥҥэ элбэх учуутал, ону тэҥэ оскуола үлэһиттэрэ үөрэх министиэристибэтин, улуус, нэһилиэк, оскуола салалтатын бочуотунай грамоталарын, махтал, эҕэрдэ суруктарын үрдүк трибунаттан туттулар. Үлэлэригэр үрдүк ситиһиилээх учууталлар сыралаах үлэлэрэ үрдүктүк сыаналанан түөскэ кэтэр бэлиэни тутан көрөөччүлэр ытыспыт тыаһынан доҕуһуоллаан өссө өрө көтөҕөн үөрүүнү тэҥҥэ үллэһиннибит. Дуоһуйуохпутугар диэри 2 чаастаах оскуола күнүнэн тэриллибит кэнсиэри көрдүбүт. Уонна учууталларбыт барахсаттар бары эдэрдэрэ, кыраһыабайдара, ырыаһыттара ол талааннара үөрэтэр оҕолоругар бэриллэн ама маннык кэрэҕэ, ырыаҕа-үҥкүүгэ уһуйуллубут оҕолортон киһи туох куһаҕаны күүтэрэй диэн искэр үөрэ саныыгын.
Кэнсиэр кэннэ ыҥырыктаах ыалдьыттар сандалы остуол тула, тыа сирин минньигэс аһын барытын боруобалаан, астыммыттарын биллэрэн үгүс ырыа ылланна.
Сыл бүтэн эрэр, саргылаах саҥа дьыл чугаһаата бырааһынньык диэн учуутал өрөөбөт, сарсыҥҥыттан эмиэ тэтимнээх үлэ саҕаланар, дьол-соргу аргыстаныҥ, ситиһии сиэттэстин!
Февронья НИКОЛАЕВА