Уһулуччулаах учуутал, кыраайы үөрэтээччи, чинчийээччи, Үлэ Дьоруойа Петр Хрисанфович Староватов төрөөбүтэ 150 сыллаах үбүлүөйүн Сунтаар улууһугар түмүктүүр тэрээһин — «II регионнааҕы Староватовтыы ааҕыылар” кини аатын 95 сыл чиэстээхтик сүгэр Элгээйи орто уопсай үөрэхтээһин оскуолатыгар ахсынньы 7 күнүгэр үрдүк таһымҥа буолан ааста.
Үөрүүлээх тэрээһин олохтоох кулуупка режиссер, СӨ култууратын туйгуна Эльвира Николаева туруорбут П.Х. Староватов олоҕун көрдөрөр дьүһүйүүтүттэн саҕаланна. Оскуолабыт учууталлара, нэһилиэк олохтоохторо үйэлэри уҥуордаан ааттана олорор ытык киһибит олоҕун ыалдьыттарга итэҕэтиилээхтик оонньоон көрдөрөн тэрээһини ордук киэргэттилэр.
Улууспут баһылыга Анатолий Григорьев П.Х. Староватов Элгээйигэ үлэлээн ааспыт кэмнэрэ Сахабыт сирин сайдыытыгар сүдү суолталааҕын бэлиэтээн туран, Ил Түмэн грамоталарын, Сунтаар улууһун үрдүкү наҕараадаларын туттартаата.
Эҕэрдэ тыллары Элгээйи нэһилиэгин баһылыга Павел Григорьев, Сунтаар улууһун үөрэҕириитин салалтатын начальнигын солбуйааччы Борис Васильев, оскуолабыт дириэктэрэ Софья Игнатьева эттилэр. Математика учуутала Туйара Борисовна Евсеева өр сыллаах таһаарыылаах үлэтин иһин Саха Өрөспүүбүлүкэтин үөрэҕириитин туйгуна буолла. Арассыыйаҕа Педагог уонна Аҕа сүбэһит сылынан оскуола быйыл олохтообут П.Х.Староватов аатынан истипиэндьийэтин алын кылаас наставник учууталыгар, РФ уопсай үөрэхтээһинин бочуоттаах үлэһитигэр Лена Васильевна Ивановаҕа туттардылар.
П.Х. Староватов төрөөбүтэ 150 сылыгар уонна Элгээйи – Дьокуускай маршрутунан бастакы сатыы хаамыы 35 сылыгар анаан маҥнайгы алмаас көстүбүт сиригэр Соколинайга Элгээйиттэн 100 км үөрэнээччилэрдиин сатыы хаамыы кыттыылаахтарын чиэстээтилэр.
“II Староватовтыы ааҕыыларга” 4 Бүлүү, Нам, Миирнэй улуустарыттан, Дьокуускайтан барыта 116 үөрэнээччи, устудьуон, педагог 22 оскуолаттан, 3 мусуойтан, 2 оскуола иннинээҕи оҕо тэрилтэлэриттэн кыттан, Дьоруойбут аатын үйэтитиигэ, кыраайы үөрэтиигэ, олохтоох мусуойдар үлэлэрин иитиигэ-үөрэтиигэ туһаныыга уопуттарын түмэн, бырайыактарын оҥорон 9 араас секцияҕа экспердэр дьүүллэригэр таһаардылар.
Кыайыылаахтарынан улахан дьоҥҥо Элгээйи оскуолатын алын кылааһын учууталларын бөлөҕө, Павлова Людмила Николаевна (Элгээйи оскуолата), Августина Васильевна Аркадий Анатольевич Архангельскайдар (Түбэй оскуолата), Иванова Саргылана Моисеевна (Сунтаар 3 оскуолата), Егорова Мария Николаевна, Егорова Виктория Владимировна (Күндэйэ оскуолата) буоллулар. Оҕолорго Татаканова Алтынай, Егоров Дамир (Элгээйи оскуолата), Третьяков Антон (Кутана оскуолата), Илларионова Вилена, Архангельскай Арылхан (Түбэй оскуолата) үлэлэрэ бастыҥнарынан буоллулар.
Күүтүүлээх күндү ыалдьыттарынан П.Х.Староватов аатынан Бүлүүтээҕи кыраайы үөрэтэр мусуой үлэһиттэрэ буоллулар. Мусуой салайааччыта Татьяна Афанасьева худуоһунньук Е.Н. Маяровскай төрөөбүт кыраайга, айылҕаҕа тапталы хоһуйар үлэлэрин быыстапкатын билиһиннэрдэ. Улуус аҕа баһылыгын солбуйааччы Гаврил Еремеев үөрүүлээх тэрээһиммитин түмүктээтэ. Оҕолор, учууталлар эҕэрдэ нүөмэрдэрэ киэргэттэ.
П.Х. Староватов аатынан Элгээйи орто оскуолатыгар бу күн ыалдьыттаабыт, Староватовскай ааҕыыларга кыттыбыт дьон Дьоруой бэлиэлээх сувенирдаах, кини туһунан кинигэлээх, «Күрүлгэн” сурунааллаах уһулуччулаах учуутал, кыраайы үөрэтээччи, чинчийээччи, Үлэ Дьоруойа Петр Хрисанфович Староватов туһунан өссө да элбэҕи үөрэтэр, билэр, кини олоҕун холобур оҥостор баҕалаах тарҕастылар.
Улууспут, нэһилиэкпит аҕа баһылыктарыгар, үөрэҕирии салалтатыгар, «Оһуор» култуура киинигэр, Бүлүүтээҕи кыраайы үөрэтэр мусуой кэлэктиибигэр махталбын биллэрэбин.
Софья ИГНАТЬЕВА, П.Х. Староватов аатынан Элгээйи орто уопсай үөрэхтээһин оскуолатын дириэктэрэ, РФ уопсай үөрэхтээһинин бочуоттаах үлэһитэ.