Ытыктабыллаах Анатолий Николаевич, доруобуйа харыстабылын үлэһиттэрэ!
«Сунтаар улууһа (оройуона)» муниципальнай оройуон дьаһалтатын уонна Сунтаар улууһун дьокутааттарын Сэбиэтин ааттарыттан Эһигини доруобуйа харыстабылын үлэһиттэрин күнүнэн итиитик-истиҥник эҕэрдэлиибит!
Чөл буолуу олох сүрүн ирдэбилэ, уһун үйэлэнии бигэ тирэҕэ. Бу олус уустук, улахан эппиэтинэстээх үлэҕэ сүрэххитин-быаргытын ууран, дууһалыын долгуйан, дьоммут туһа диэн, олоххутун анаан туран үлэлииргит олус кэрэхсэбиллээх, холобурдаах быһыы. Сунтаарбыт улууһун дьоно-сэргэтэ чөл туруктаах буоларын туһугар үлэлии-хамныы сылдьар үрүҥ аанньалларбытыгар барҕа махталбытын биллэрэбит!
Олоххут сырдык ыра сулуһа оҥостубут идэҕит үтүө түбүктэрдээх буоллун!
Өссө төгүл доруобуйа харыстабылын үлэһиттэрин идэлээх бырааһынньыккытынан эҕэрдэлээн туран, инники да өттүгэр дьону эмтээһиҥҥэ, нэһилиэнньэҕэ ыарыыны эрдэ сэрэтиигэ, аныгы үрдүк технологиялары туһанан, бу уустук идэҕэ уһуйуллубут билиигитин куруук үрдэтэ, тупсара туруҥ диэн алгыс тыл бастыҥын аныыбыт!
Эһиэхэ, Сунтаарбыт улууһун доруобуйа харыстабылын үлэһиттэригэр, Сахабыт сирин алмааһыныы кытаанах доруобуйаны, тус олоххутугар дьолу-соргуну баҕарабыт!
Анатолий ГРИГОРЬЕВ, Сунтаар улууһун Аҕа баһылыга,
Ульяна ПОПОВА, Сунтаар улууһун дьокутааттарын Сэбиэтин бэрэссэдээтэлэ