Бүгүн, сэтинньи 8 күнүгэр, С.А Зверев-Кыыл Уолун аатынан улуустааҕы норуотун айымньытын киинин тэлгэһэтигэр «Идэһэ-2024» олохтоох тыа хаһаайыстыбатын бородууксуйатын атыы-эргиэн дьаарбаҥката буолан ааста.
Быйыл дьаарбаҥка Саха Өрөспүүбүлүкэтигэр Оҕо, Сунтаар улууһугар Аҕам саастаахтарга ытыктабыл сылларынан, тыа хаһаайыстыбатын уонна астыыр-таҥастыыр бырамыысыланнас үлэһиттэрин күнүн чэрчитинэн ыытылынна.
Манна улуус араас нэһилиэктэриттэн биирдиилээн дьон, хаһаайыстыбалар, кэпэрэтииптэр кэлэн сибиэһэй эти, балыгы, сир аһын, эти-үүтү дэлэччи тэниттилэр. Өрүс уҥуордааҕы нэһилиэктэртэн ураты.
Ону сэргэ дьаарбаҥкаҕа кэлбиттэр икки ардыларыгар уу харчы бириистээх күрэстэр ыытылыннылар.
Кыстыкка тэринэр дьаарбанканы дьон-сэргэ кэтэспит буолан, элбэх киһи кытынна. Улуус бөдөҥ хаһаайыстыбаларын сэргэ биирдиилээн дьон идэһэлэрин атыыга туруордулар.
Дмитрий ЫМЫЧАНОВ