Анал байыаннай дьайыыга дьоруойдуу олоҕун толук уурбут Ньургун Григорьев – «ГРИГ» аатын үйэтитэр сыаллаах бүгүн олунньу 11 күнүгэр «Бэргэн» буулдьанан ытыыга биирдиилээн бастыыр иһин эрэгийиэннээҕи күрэхтэһии 3-с төгүлүн ыытылынна.
Хорсун саллаат кылгас ол эрэн чаҕылхай олоҕун ахтан-санаан аастахха, Ньургун ахсынньы 7 күнүгэр 2000 сыллаахха Сунтаар улууһун Уһун Күөл нэһилиэгэр Лидия, Николай Григорьевтар дьиэ кэргэттэригэр күн сирин көрбүтэ. Олоххо олус көхтөөх, чулуу спортсмен, ырыаһыт бэрдэ, эрэллээх доҕор этэ. Оҕо эрдэҕиттэн байыаннай буолар ыра санаалаах уолчаан Сунтаардааҕы 3 №-дээх оскуолатын бүтэрээт аармыйаҕа ыҥырыллан ытык иэһин төлүү барбыта. Чита куоратыгар танковай чааска наводчигынан сулууспалаабыта. Онтон 5 ый сулууспалаат 3 сылга хантараак баттаан маҥнай Сочига ол кэннэ Алтаай кыраайыгар сулууспалаабыта. Кыраҕы харахтааҕын, бэргэн ытааччы буоларын бэлиэтии көрөннөр снайперга уһуйуллубута. Кини Аҕа дойду сэриитин кыттыылааҕын хос эһэтин Иосиф Иванович Түүлээхэп туйаҕын хатаран бэргэн ытааччы буоллаҕа.
Эдэркээн саллаат өлөр өлүүттэн куттаммакка, дойдутун көмүскүүр туһугар бигэ санаатын халбаҥнаппакка байыаннай дьайыы саҕаланыаҕыттан старшай снайперынан сылдьан күн сириттэн күрэммитэ. Бииргэ сулууспалаабыт уолаттара кинини хорсунун, ханнык баҕарарар бойобуой сорудаҕы чопчу толорорун, бигэ эрэллээх саллаат этэ диэн истиҥник саныыллар.
Буойун аатын үйэтитэр сыаллаах Сунтаар 3-с №-дээх уонна спорт оскуолаларын, Ньургун төрөппүттэрин көҕүлээһиннэринэн ытыы күрэҕэ үрдүк таһымҥа буолан ааста. Быйылгы эрэгийиэннээҕи күрэххэ Ньурбаттан, Бүлүүттэн, Сунтаартан 62 кыттааччы кэлбит.
Тэрээһин хамаандалар сэлэллии хааман киириилэриттэн, сахалыы сиэринэн кымыһынан, алаадьынан кэлбит дьону күндүлээһининэн саҕаланна. Улууспут аҕа баһылыга Анатолий Григорьев күрэх кыттааччыларыгар эҕэрдэтин ону тэҥэ Ньургун Григорьев төрөппүттэригэр Лидия Леонидовнаҕа, Николай Николаевичка, бииргэ төрөөбүт убайыгар билигин байыаннай дьайыы кыттыылааҕар Николайга, үөрэммит оскуолатыгар махтал тылларын эттэ. Сыл ахсын кыттааччы ахсаана элбээн иһэрин бэлиэтээн кэнэҕэски ыччакка дойдуга бэриниилээх буолууну иитэрин тоһоҕолоото.
Сунтаар 3-с №дээх оскуолатын дириэктэрэ Андрей Николаев, Сунтаар нэһилиэгин баһылыгын эбээһинэһин толорооччу Семен Николаев, Сунтаар улууһун дьаһалтатын физкультураҕа уонна успуорка отделын салайааччыта Дьулустан Егоров, дьокутаат, тириэньэр Николай Данилов, күрэхтэһии кылаабынай судьуйата Афанасий Жараев, Ньургун төрөппүттэрэ, убайа Николай кыттааччыларга махтал тылларын, истиҥ баҕа санааларын, ким кыахтаах ол кыайдын диэн этиилэринэн турниры арыйдылар.
Байыаннайдыы таҥнан-саптан, ох курдук оҥостон кэлбит бэргэн ытааччылар тыҥааһыннаах киирсиилэрин түмүгүнэн кыайыылаахтар билиннилэр:
8-9 кылаас кыргыттар:
1 миэстэ — Азалия -Күннэй Саввинова (Сунтаардааҕы лиссиэй)
2 миэстэ — Милана Егорова (Хоро)
3 миэстэ — Сайаана Керемясова (Тойбохой)
8-9 кылаас уолаттар:
1 миэстэ — Иван Нахов (Хадан)
2 миэстэ — Кирсан Ксенофонтов (Сунтаардааҕы лиссиэй)
3 миэстэ — Мичил Осипов (Сунтаардааҕы 1-кы №-дээх оскуола )
10-11 кылаас кыргыттар:
1 миэстэ — Ньургуйаана Корякина (Бүлүү)
2 миэстэ — Агния Семенова (Тойбохой)
3 миэстэ — Алена Максимова (Бордоҥ)
10-11кылаас уолаттар:
1 миэстэ — Эрхан Тимофеев (Кутана)
2 миэстэ — Виктор Тимофеев (Тойбохой)
3 миэстэ — Меркурий Томский (Бүлүү)
Тириэньэрдэр:
1 миэстэ — А.И.Семенов (Тойбохой)
2 миэстэ — П.П.Иванов (Сунтаардааҕы 2-с №-дээх оскуола)
3 миэстэ — П.Р.Кырелов (Дьаархан)
Анал ааттар:
«Бэргэн» — Юлиана Семенова 10 кыл. (Кутана,)
«Дьулуур» — Ориона Наумова 8 кыл. (Сунтаардааҕы 3-с №дээх оскуола)
«Эрэл» — Айтыын Кузьмин 8 кыл. (Дьаархан)
«Табыгас» — ЯрославТереясов 11 кыл (Бордоҥ)
Абсолютнай киирсии түмүгүнэн муҥутуур кыайыылааҕынан Сунтаар лиссиэйин 8-с кылааһын үөрэнээччитэ Азалия-Күннэй Саввинова буолан Григорьевтар дьиэ кэргэн туруорбут борооскунан, тириэньэрэ харчынан наҕараадаланнылар. Маны сэргэ тириэньэрдэр И.И.Попов (Бүлүү) уонна А.Д.Петров (Ньурба) «Аҕа дойдуга бэриниилээх ыччаты иитиитин иһин» харчынан бириэмийэ тутан үөрүүлэрэ үксээтэ.
Күрэхтэһии туһунан Лидия Григорьева Ньургун ийэтэ санаатын маннык үллэстэр:
— Оҕобут сырдык кэриэһигэр ыытыллар “Бэргэн” күрэхтэһиини бастаан 2023 с. тэрийбиппит. Маҥнай улуус онтон былырыыҥҥаттан эрэгийиэн таһымнаах күрэхтэһии быйыл эмиэ бэрт тэрээһиннээхтик буолла. Оҕобут кыра эрдэҕиттэн байыаннай буолуон баҕалааҕа. Аармыйаҕа сулууспалыы сылдьан баҕа өттүнэн хантараак баттаабыта. Саамай чаҕылхай, иннин хоту баран иһэр хорсун саллаат диэн хамандьыыра сөҕөрө. Элбэх бойобуой сорукка сылдьыбыттарын онно кини бэйэтин үчүгэй эрэ өттүнэн көрдөрбүтүн кэпсээбитэ. Бүгүҥҥү күрэхтэһиигэ Ньургун үөрэммит Сунтаардааҕы 3-с №-дээх оскуола кэлэктиибэ сүүрэн-көтөн турниры тэрийсэллэриттэн долгуйан, үөрэн туран ис сүрэхпититтэн махталбытын тириэрдэбит. Бары кыттааччыларга, тириэньэрдэргэ ситиһиини баҕарабыт.
Альбина Прокопьева, 1996-2022 с.с. үөрэх чааһыгар дириэктэри солбуйааччы:
— Ньургун киһи быһыытынан көрсүө сэмэй майгылаах, куруук күлэ-үөрэ сылдьар, кэпсэтинньэҥ оҕо этэ. Олох кыра сааһыттан байыаннай буолар баҕа санаалааҕа. Оскуолатын бүтэрээт сулууспалыы барбыта. Байыаннай идэтин баһылыыр ыра санаалааҕа. Саҥа дьыл кэннэ тохсунньуга уоппускатыгар кэлэ сылдьан оскуолатыгар ыалдьыттаабыта. Оҕолору кытта көрсүһэн, учууталларын кытта ирэ-хоро кэпсэппитэ. Оскуолатын минньигэс астаах остолобуойугар тото-хана аһаан астынан аҕай барбыта. СВО саҕаланыытыгар тутатына байыаннай дьайыыга барбытын истибиппит. Биһиги бастыҥ үөрэнээччибит, спортсмен, ырыаһыт оҕобут туһунан сырдык, ыраас, үтүө эрэ өйдөбүл үйэлэргэ сүппэттик хаалыаҕа.
Алена ИВАНОВА