Кулун тутар 23 күнүгэр Дьокуускай куоракка хомус куттаахтарга уонна уһуйааччыларыгар аналлаах «Теоретические и практические основы преподавания приемов игры на предварганах» диэн Өрөспүүбүлүкэтээҕи сэминээр тэриллэн ыытылынна. Бу сэминээргэ уһуйааччылар Елена Тастыгина (Жатай), Михаил Винокуров (Дьокуускай), Туяра Алексеева, Анна Чярина (Сунтаар) үлэлэрин уопутун атастастылар.
С.А.Зверев-Кыыл Уолун аатынан Сунтаардааҕы норуот айымньытын киинин фольклор салаатын исписэлииһэ Туяра Алексеева «Хомуска «ырыалаах тардыы» – үгэскэ олоҕурбут истиил» диэн дьуохардьыт, тойуксут, хомусчут Мария Егорованы-Тойуктаах Маарыйа оҕо эрдэҕиттэн сырса сылдьан истиэҕиттэн «хомуска ырыалаах тардыыны» тарҕатар сыаллаах-соруктаах үлэлиир эбит. «Кылыгырас кылыһах, дорҕооннох тойук» уонна хомуска «ырыалаах тардыы» диэн дьарык хаамыытын көрдөрдө, «Алгыс» тойугу хомуска дьүрүһүтэн иһитиннэрдэ. Дьикти кылыһахтаах куолаһынан «… Саргылаахай күммүт, Салаллыбытын туһугар, Сахалыы дьалаһыан Алҕаатаҕым буоллунууй!…» диэн хомуска туойда. Истэргэ эриэккэс, Үрдүк Айыылартан алгыс түспүтүн курдук сананныбыт. Дьэ ити курдук, өрөспүүбүлүкэ оскуолаларыгар хомус тардыытын үөрэтиигэ утумнаах үлэ ыытыллара көстөр. Хомус тула истиҥ кэпсэтии таҕыста, уопут атастаһыы наадалааҕын эттилэр уонна ити сатабыл, үөрүйэх, билии-көрүү хомуһу үөрэтэр үлэҕэ хайдах баҕарар туһаныллыан сөптөөҕүн өйдөөн тарҕастыбыт.
Хомус түмэлин 30-тан тахса сыллаах үлэтигэр хомуска үөрэтии сылтан сыл тупсан иһэр, баай уопут мунньуллар. Хомус уһуйааччылара туспа суоллаах-иистээх, бэйэлэрин уопуттарын тарҕатар кыахтаах үлэни-хамнаһы тэрийэллэрэ түмэл араас тэрээһиннэриттэн көстөр. Бу тэрээһиннэр саха норуотун символын быһыытынан билиниллэр хомус барахсан сайдарын туһугар туһуланар.
Евдокия СЛЕПЦОВА,
Хомус түмэлин уонна киинин билим уонна сырдатыы үлэтин мэтэдииһэ