СӨ Ил Дарханын граныгар «Аан дойду норуоттарын хомуһун түмэлэ уонна киинэ», итиэннэ «Хомус» уопсастыбаннай киин бииргэ үлэлэһэннэр 2023 с. “Культурно-образовательное событие «Хомусный код” бырайыагы оҥорон кыайыылаах тахсыбыттара. Салгыы СӨ Бырабыыталыстыбатын бэрэссэдээтэлин солбуйааччы Сергей Местников бу бырайыак ураты тыыннааҕын, кэнчээри ыччакка туһалааҕын бэлиэтии көрөн, өссө да салҕанан бара туруохтааҕын туһунан сорук киллэрбитэ. Оттон, бырайыак салгыы сайдарын туһугар СӨ Үүнэр көлүөнэ тус сыаллаах пуондата уонна «Аан дойду норуоттарын хомуһун түмэлэ уонна киинэ» бииргэ үлэлэһэллэр.
Күн бүгүн бырайыак аата «Хомус эйгэтэ» диэн ааттанан, өрөспүүбүлүкэ оскуолаларын үөрэнээччилэригэр култуура уонна үөрэхтээһин ситимнээх ураты эйгэтин тэрийэ, үүнэр көлүөнэни хомуска сыһыаран, үөрэтэ-такайа билиһиннэрэ сылдьаллар.
Бу бырайыак чэрчитинэн бүгүн, олунньу 6 күнүгэр, А.П. Павлов аатынан Сунтаар бастакы нүөмэрдээх оскуолатыгар Дьокуускай куораттан анаан-минээн «Хомус эйгэтэ» бырайыак оператора Станислав Афанасьев уонна уһуйааччылар Алена Платонова, Айсен Деллохов оҕолору хомус дьикти дьүрүскэнигэр үөрэтэн саҕалаатылар. Кинилэр бу бырайыак айанын Олоҥхо дойдутунан сураҕырар Сунтаарбыт улууһуттан саҕалаабыттара мээнэҕэ буолбатах. Үөрүүлээх түгэн арыллыытыгар улуустааҕы үөрэҕирии салалтатын иитиигэ уонна эбии үөрэхтээһиҥҥэ салаатын сэбиэдиссэйэ Александра Павлова, Сунтаар бастакы нүөмэрдээх оскуолатын дириэктэрэ Афанасий Матвеев бэйэлэрин эҕэрдэлэрин эттилэр. Уһуйааччылар Иван Егорович Алексеев – Хомус Уйбаан 2021 с. тахсыбыт «Куйаартан кутуллар дорҕооннор» кинигэтин оскуола дириэктэригэр Афанасий Матвеевка туттардылар.
Маны сэргэ, бырайыак иһинэн Саха сирин биллэр-көстөр хомус уустарын өйөбүллэринэн, анал байыаннай дьайыы кыттыылаахтарын оҕолоругар бэлэх быһыытынан хомус туттарар үгэстээхтэр. Ол курдук, бүгүн хомуһу 20 үөрэнээччигэ аан дойдутааҕы кылаастаах тимир ууһун маастара Василий Уаров туттарда. Үөрэх уопсайа 200-чэ оҕону хабан икки күн устата ыытыллыа.
«Хомус эйгэтэ» бырайыак ыыра киэҥ, үлэтэ далааһыннаах. Онон, салгыы Ньурба, Кэбээйи, Бүлүү, Үөһээ Бүлүү, Өлүөхүмэ о.д.а. улуустарынан сылдьан хомуска оонньуур үгэһи үйэтитэн, көлүөнэттэн-көлүөнэҕэ тириэрдэр соруктаахтар.
Елизавета ТИТОВА