Быйыл Аҕа дойду сэриитэ түмүктэммитэ үбүлүөйдээх 80 сылын бэлиэтиэхпит. Бэлиэ күн чэрчитинэн сыл устата араас хабааннаах тэрээһиннэр ситимнээхтик ыытыллаллар. Ол курдук, ааспыт нэдиэлэҕэ Сунтаар 3 №-дээх оскуолатыгар «Биһиги эһэлэрбит сэрии кыттыылаахтара» научнай-практическай конференция буолла. НПК-ны гуманитарнай предмэттэр методическай холбоһуктара тэрийдилэр. Икки секцияҕа арахсан үлэлэри көрдүлэр. Барыта 10-тан тахса оҕо кырыктаах кыргыһыыга кыттыспыт хос эһэлэрин туһунан кинилэр сылдьыбыт сырыыларын, бойобуой суолларын үөрэтэн, үгүс чинчийиилэри оҥорбуттарын доргуччу аахтылар, кэпсээтилэр.
Экспертар түмүктэринэн 5-с-8-с кылаастарга I-кы истиэпэннээх лауреат аатын Нарыйаана Григорьева 8-с кылаас, салайааччыта Д.Н.Павлова. 1 миэстэни Арчыл Павлов, 8-с кылаас, 2 миэстэ Кэйн Кириллин 8-с кылаас, 3 миэстэ Тима Афанасьев 8-с кылаас буоллулар. Оттон 9-с-11-с кылаастарга I-кы истиэпэннээх лауреат аатын Айысхан Иванов, салайааччы А.Н.Николаева, 1 миэстэ Арылхан Меркурьев 10-с кылаас, 2-с миэстэ Сандаара Семенова 10 кылаас, 3-с миэстэ Олег Попов 10-с кылаас. Бу үлэлэр түмүктэринэн Кыайыы күнүн көрсө хомуурунньук тахсара былааннанар.
Сэрии толоонугар охтубут хорсун буойуттары, тыылга эйэлээх олох иһин турууласпыт ытык дьоммутун кэриэстиир ытык иэспит буолар.
Алена ИВАНОВА