Бу сыл иккис аҥаарыгар «Сунтаар сонуннарыгар» сурутуу үгэннээн бара турар. Биһиги эрэдээксийэбит улууспут хаһыатыгар сурутууну көҕүлээн араас аахсыйалары тэрийэн ыытар. Холобур, Арассыыйаҕа Дьиэ кэргэн, улууспутугар Аҕам саастаахтарга ытыктабыл сылларын чэрчилэринэн, сурутуу хампаанньата бүтүөр диэри, ол эбэтэр бэс ыйын 20 күнүгэр диэри, «Аҕам саастаахтарга хаһыатта суруттар» уонна «СВО кыттыылаахтарын дьиэ кэргэттэригэр «Сунтаар сонуннара» хаһыаты бэлэхтээ» диэн аахсыйалаахпыт. Аахсыйа чэрчитинэн элбэх киһи биир дойдулаахтарыгар хаһыат сурутан бэлэх оҥордо.
Оттон Николай Спиридонов баһылыктаах Аллыҥа нэһилиэгин тэрилтэлэрин салайааччылара бука бары биирдии ыалга улуустарын хаһыатын сурутан соһуччу бэлэх оҥордулар. Кинилэр үтүө санааларынан Аллыҥаҕа олорор аҕам саастаах уонна байыаннай дьайыы кыттыылаахтарын уонтан тахса ыала бу сыл аҥаарыгар улуустарын хаһыатын салгыы ааҕар буоллулар. Баһылык Николай Васильевич тэрилтэ салайааччыларыгар холобур буолан биир бастакынан байыаннай дьайыы кыттыылааҕын дьиэ кэргэнигэр хаһыат сурутан биэрдэ.
Оттон Александр Романов баһылыктаах Сиэйэ олохтоох дьаһалтата биһигини кытары бииргэ буолан, аахсыйаны өйөөн, СВО-ҕа сылдьар биэс биир дойдулаахтарын дьиэ кэргэттэригэр хаһыат сурутан бэлэхтээбиттэрэ эмиэ үтүө холобур. Сиэйэ дьаһалтата бу маннык быһаарыыны ылыммытын аан бастакынан биллэрбитэ.
Александр Николаевич: «Хаһыат суруйбута историяҕа хаалар, күн-дьыл төһө да ааспытын иһин хаһыат саһарбыт страницаларыттан олус наадалаах информациялары булан ааҕыахха, туһаныахха сөп» диэн бэлиэтээн этэр.
Үтүө санаанан салайтаран үлэлии олорор баһылыктардаах Аллыҥа, Сиэйэ дьаһалталарыгар биһиги, хаһыатчыттар, махталбытын биллэрэбит уонна атын да нэһилиэктэр кинилэр холобурдарын батыһан, бу хаалбыт күннэргэ биир дойдулаахтарыгар улуустарын хаһыатын сурутан бэлэх уунуохтара диэн эрэнэбит.
Манна даҕатан эттэххэ, «Сунтаар сонуннара» хаһыаты бу сыл иккис аҥаарыгар сурутууга чэпчэтиилээх дэкээдэ биллэриллэр. Ол курдук, бэс ыйын 10 күнүттэн 20 күнүгэр диэри улууспут хаһыатын алта ыйга баара-суоҕа 548,16 солк. сурутар кыахтанныгыт.
Түгэни мүччү туппакка, сурутуу хампааанньата бүтэ илигинэн улууһуҥ хаһыатын суруттар. Төрөөбүт дойдуҥ – СУНТААР, ааҕар хаһыатыҥ — «СУНТААР СОНУННАРА».
Билсэр төлөпүөннэргит: 89142789596, 89143000136
Яина ВЛАСЬЕВА