Кэлэр сылга улууспут хаһыатыгар сурутуу үгэннээн бара турар. Билиҥҥи туругунан, хаһыакка сурутуу сырыта курдук.
«Сунтаар сонуннара» эрэдээксийэ сурутааччы ахсаанын элбэтэргэ, араас көлүөнэ дьону сахалыы, чуолаан хаһыаты ааҕалларын көҕүлээн бу сыл бүтүөр диэри араас тэрээһиннэри ыыттыбыт. Аахсыйабыт да баар ахан. Манна биһиги эрэллээх ааҕааччыларбыт, сурутааччыларбыт өйөбүллэрэ улахан. Холобур, аҕам саастаахтарга, СВО дьиэ кэргэнигэр аналлаах аахсыйалары нэһилиэк баһылыктара, тэрилтэ салайааччылара өйөөтүлэр. Онон кинилэргэ махтал мааныта, баһыыба бастыҥа буоллун!
Аны кэлэр 2025 сылга толору суруппут ааҕааччыларбытыгар бириистээх оонньуу ыытаары тэринэн олоробут. Манна эмиэ биһигини өйөөн, успуонсардыыбын диэн бэйэтин баҕа санаатын биллэрбит күндү ааҕааччылаахпыт. Дьэ, ол ким эбитий? Кириэстээхтэн төрүттээх, оҕону үөрэтиигэ-иитиигэ бэйэтин киэҥ билиитин, сатабылын биэрэн үлэлии-хамсыы сылдьар Андриан Максимов буолар. Андриан Егорович хаһыат ыытар аахсыйатыгар мэлдьи кыттан, төрөөбүт, улааппыт нэһилиэгин саастаах дьонугар сылын аайы хаһыат сурутан бэлэх оҥорор. «Аны быйыл успуонсар буолуум» диэн бассааппар суруйда.
«Аҕам Егор Егорович суоппар идэлээҕэ. Сопхуоска суоппардаабыта. Оскуолаҕа трактороведениены үөрэтэ сылдьыбыта. Кэлин эдэр техниктэр станцияларыгар педагог быһыытынан таһаарыылаахтык үлэлээбитэ. Оттон ийэм Зинаида Георгиевна ырыа кэрэ эйгэтигэр ыччаты уһуйбута, үүнэр көлүөнэни духуобунай сайдыыга, патриотическай тыыҥҥа иитэн, үгүс үлэни ыыппыта. Төрөппүттэрим барахсаттар улуустарын хаһыатын олус да сөбүлээн ааҕаллара. Мэлдьи сурутар буолаллара», — диир Андриан Егорович.
Кини идэтинэн Сунтаардааҕы гимназияҕа, Оҕо дьоҕурун сайыннарар кииҥҥэ таһаарыылаахтык үлэлээбитэ. Билигин Дьокуускайга көһөн, өрөспүүбүлүкэтээҕи лиссиэйгэ учууталлыы сылдьар.
Улууспут үтүө-мааны дьоно, кэлэр сылга хаһыакка сурутуу ахсынньы 20 күнүнэн түмүктэнэр. Онон бу хаалбыт күннэри баттаһа «Сунтаар сонуннарын» суруттарыҥ диэн өссө төгүл ыҥырабыт. Оттон биир сылга толору суруппуттарга бириистэри оонньотуу ахсынньы 28 күнүгэр хаһыат телеграм каналыгар быһа эпииринэн ыытыллыаҕа. Хастан буоларын, сигэтин эрдэттэн биллэриэхпит.
Яина ВЛАСЬЕВА