Кулун тутар 17 күнүгэр Арассыыйаҕа олоҕу-дьаһаҕы хааччыйар эйгэ үлэһиттэрин күнэ бэлиэтэнэр. Бу күнү көрсө уонна Дьиэ кэргэн сылынан сиэттэрэн бүгүн Сунтаарбыт улууһун ОДьКХ Күндэйэ уонна ЖКС ХЭТ Кэмпэндээйи нэһилиэктэрин учаастактарын үлэһиттэриттэн ааҕааччыларбытыгар билиһиннэриэхпит.
Георгий Саввинов
Саввиновтар
ЖКС ХЭТ (сал. И.Р. Яковлев) Кэмпэндээйитээҕи учаастагын маастара Георгий Саввинов идэтинэн теплотехник, элбэх оҕолоох ыал аҕата. Устудьуоннуу сылдьан Уус Майаттан төрүттээх Любомира диэн кыыһы көрсөн билигин номнуо 4 оҕолоох дьиэ кэргэн. Саввиновтар улаханнара кыыс 9-с кылаас, үс уол, мантан саамай кырачааннара уһуйаан иитиллээччитэ. Тыа сирин элбэх оҕолоох эдэр ыала билигин хаһаайыстыбаларыгар 12 төбө сылгылаахтар. Ыал аҕата Георгий оҕолору төрөппүт бэйэтин холобурунан, ол эбэтэр батыһыннара сылдьан, оҕо сэҥээрэр, сэргиир кэмин мүччү туттарбакка көрдөрөн үтүгүннэрдэҕинэ элбэххэ үөрэнэллэр, күннээҕигэ оҕо туох эбит эбээһинэстээх буолуохтаах диэн этэр. Икки обургу уолаттара аҕаларын, эһэлэрин кытта окко, маска, балыкка мэлдьи үөрүүнэн барсаллар. Маннык барыы сүпсүлгэнэ буоларын уолаттар олуһун диэн күүтэллэр, барсалларыттан туохтааҕар да үөрэн-көтөн сэргэхсийэ түһэллэр. Оттон күннээҕи эбээһинэстэригэр кыһыҥҥы өттүгэр хаар күрдьүүтэ, тиэргэҥҥэ баар икки убаһаларын аһатыы буолар. Төһө да кыра буоллаллар, оҕолор эбээһинэстэрин этиппэккэ, санааларыттан оҥороллоро төрөппүккэ ордук күндү. Оннооҕор сайын аҕаларын батыһа сылдьан «Синтай» тыраахтарга саппай уопсан талкыйан үөрэнэ сатыыллар.
Георгий бэйэтин үлэтин-хамнаһын туһунан маннык сэһэргиир:
– Мин теплотехник үөрэхтээхпин, 2008 с. бүтэрэн, ОДьКХ ГУТ Сунтаардааҕы филиалыгар маастарынан үлэлии кэлбитим, армияҕа сулууспалаабытым. Онтон хочуолунайбыт ЖКС-тарга бэриллэн Кэмпэндээйи учаастагар үлэлиир буолбутум.Билигин алта үлэһиттээхпит. Нэһилиэнньэни сылааһынан хааччыйыы диэн эппиэтинэстээх үлэ буолар. Онон күннэтэ сайдар олохпутугар киһи бэйэтин билиитин-көрүүтүн хаҥата сылдьыахтаах уонна киһи быһыытынан дьоҥҥо үчүгэй сыһыаннаах буолуохха наада. Кэллиэгэлэрбин идэлээх күннэринэн эҕэрдэлиибин. Чэгиэн сылдьыҥ, үлэҕит-хамнаскыт этэҥҥэ буоллун!
Сергей, Петр
Семеновтар
Салгыы ОДьКХ Сунтаардааҕы филиалын (дир. М.Ю.Петров) Күндэйэтээҕи учаастагыттан Семеновтары билиһиннэрэбит. Ыал аҕата Сергей 1990 с. Мотрена Ивановналыын холбоһон 5 оҕолонон, 8 сиэн эбэтэ, эһэтэ буолан олороллор. Кини ОДьКХ-ҕа аан маҥнай 1997 сыллаахтан производственнай отдел салайааччытынан саҕалаан күн бүгүнүгэр диэри маастарынан үлэлиир. Оттон уоллара Петр армияттан кэлээт олоҕун аргыһын Надежданы көрсөн билигин Күндэйэ үс оҕолоох эдэр ыала. Петр эмиэ ОДьКХ үлэһитэ. Кини бу эйгэҕэ 2019 с. хачыгаарынан үлэлиир. Тыа сиригэр өрөбүлэ суох үлэ арааһа элбэх, онон быыс-арыт көһүннэҕинэ Петр тыраахтар өҥөтүн оҥорор буолан нэһилиэнньэни абырыыр.
Семеновтар эмиэ сылгы ииттэллэр. Сайыҥҥы өттүгэр Харыйалаахха тахсан оттоон, сир астаан үлэни, сынньалаҥы табатык дьүөрэлээн таһаарыылаах, туһалаах кэми атаараллар. Ону тэҥэ эр киһиэхэ булт-алт бэйэтэ ураты кэтэһиилээх-манаһыылаах кэм буолан, Семеновтарга да сааскы кус туохтааҕар да күүтүүлээх.
Ыал аҕа баһылыга Сергей Петрович ОДьКХ эйгэтигэр өр үлэлээбит, үгүс уопуттаах киһи үлэтин туһунан маннык сэһэргиир:
– Мин ОДьКХ-ҕа 1997 сыллаахтан үлэлиибин. Ити саҕана кып-кыра хамнаска үлэлиир этибит, онтубут даҕаны сыл аҥаара курдук хойутаан кэлэрэ. Арыый да хамнастаах үлэ көрдөнөн уурайаллара, ол да иһин үлэһит илии тиийбэтэ. Төһө даҕаны уустук буоллар бэриниилээхтик үлэлээн-хамсаан, үлэттэн чаҕыйан турбакка күн бүгүн үлэлии сылдьааччылар бааллар. ОДьКХ эйгэтэ кэнники күүскэ сайынна, тубуста. Үлэһиттэргэ усулуобуйа бөҕө оҥоһуллар. Оннооҕор хочуолунайдарга таҥас сууйар массыына, душ, ыраас иһэр уу, толору хааччыллыы барыта баар буолла, испиэс таҥаһынан эмиэ хааччыллабыт, сынньана барарга айан суола төлөнөр, онон уруккуга тэҥнээтэххэ билигин үөрэ-көтө үлэлиибит. Түгэнинэн туһанан ОДьКХ бары үлэһиттэрин идэлээх бырааһынньыгынан эҕэрдэлээн туран, ыстаал курдук доруобуйаны, уостан бүппэт күүһү-уоҕу, үлэҕитигэр ситиһиилэри баҕарабын!
Бу курдук биир эппиэтинэстээх эйгэ тэрилтэлэрин үлэһиттэрэ тыа сиригэр үлэни, хаһаайыстыбаны тэҥинэн тутан, оҕону бэйэ холобурунан, үлэҕэ, сынньалаҥҥа тэҥҥэ илдьэ сылдьан элбэххэ үөрэтэллэр.
Юлия-Айархаана АЛЕКСЕЕВА