Ахсынньы 10 күнүгэр, Сунтаар сэлиэнньэтэ төрүттэммитэ 260 сылын чэрчитинэн улуус үөрэҕин салалтатын иһинэн үлэлиир үөрэх түмэлигэр, улахан дьиэ кэргэн аҕа баһылыга, дьоҕурдаах-дьанырдаах үлэһит, эргитиилээх атыыһыт, тутааччы, кыраайы үөрэтээччи Григорий Доценко төрөөбүтэ 145 сылыгар анаммыт быыстапка тэрийилиннэ.
Григорий Спиридонович Сунтаарбыт сайдыытыгар биир улахан кылааты киллэрбит киhинэн буолар.
Түмэл салайааччыта Альбина Иванова ыалдьыттарга олус интэриэһинэй экскурсия оҥорон Григорий Спиридонович уонна кини оҕолорун туһунан кэпсээтэ.
Бу быыстапка нэдиэлэ устата туруоҕа, баҕалаах дьон кэлэн көрүҥ, сэргээҥ. Түмэл Ленин уул. 35а дьиэтигэр баар.
Дмитрий ЫМЫЧАНОВ