Билиҥҥи уустук кэмҥэ дьон-сэргэ туруктаах буоларыгар анал уйулҕаһыт идэлээх исписэлиистэр көмөлөрө олус наада. Ол курдук, Ил Дархан Айсен Николаев сорудаҕынан, СӨ Бырабыыталыстыбатын бэрэссэдээтэлин солбуйааччы Ольга Балабкина салайыытынан Өрөспүүбүлүкэтээҕи психологическай киин анал байыаннай дьайыы кыттыылаахтарын, кинилэр дьиэ кэргэттэрин өйүүр инниттэн улахан үлэни ыытар.
Бүгүн Өрөспүүбүлүкэтээҕи психологическай киин дириэктэрэ Владимир Скрябин, дириэктэри солбуйааччы Октябрина Туприна, психолог Татьяна Иванова уонна психологическай киин Сунтаардааҕы салаатын психолога Татьяна Антипина улуус баһылыгын Анатолий Григорьевы кытары көрүстүлэр. Көрсүһүүгэ анал байыаннай дьайыы кыттыылаахтарыгар итиэннэ кинилэри кытары чугастык алтыһар дьоҥҥо сүрүннээн туох үлэ барыахтааҕын, ону тэҥэ байыастар эйэлээх олоххо, уопсастыбаҕа улахан охсуута суох, чэпчэкитик киирэллэрин туһугар туох, ханнык көмө ыытыллыахтааҕын туһунан кэпсэттилэр. Хас биирдии нэһилиэккэ ити боппуруос сытыытык туруо диэн аһаҕастык эттилэр. Маныаха психологическай көмө оҥорорго улахан үлэ ирдэнэр. Ол инниттэн нэһилиэк баһылыктарыттан саҕалаан тэрилтэ салайааччыларыгар, үлэһиттэригэр о.д.а тиийэ бэлэмнээх буолаллара наада. Маны тэҥэ, Өрөспүүбүлүкэтээҕи психологическай киин үлэһиттэрэ бэйэлэрин үлэлэрин-хамнастарын, анал үөрэҕи ааспыт исписэлиистэр байыаннай дьайыы буола турар сиригэр, госпиталларга тиийэн хайдах үлэлииллэрин билиһиннэрдилэр.
Сарсын улуус дьаһалтатын аактабай саалатыгар нэһилиэк баһылыктарыгар, тэрилтэ салайааччыларыгар, анал байыаннай дьайыы тула үлэлэһэр исписэлиистэри кытары көрсөн сэминээр ыытыахтара. Ону тэҥэ, Сунтаардааҕы киин бибилэтиэкэ дьиэтигэр нэһилиэнньэни кытары тус көрсүһүү олохтуохтара.
Елизавета ТИТОВА