Кэлиҥҥи кэмҥэ дьон-сэргэ олорор усулуобуйата тупсарыгар, дойду бэрэсидьиэнэ Владимир Путин көҕүлээбит национальнай бырайыактарынан үгүс үлэ ыытылынна. Үүммүт 2025 сылтан 19 саҥа национальнай бырайыак олоххо киирэн үлэтин саҕалаан эрэр. Ол иһигэр «Продолжительная и активная жизнь» диэн мэдиссиинэ эйгэтигэр саҥа бырайыак баар буолла. Бу бырайыак иитинэн инники сылларга төрөөһүнү элбэтэр, итиэннэ киһи олорор орто сааһын үрдэтэр сорук турар.
Итинник соруктаах «Өрөспүүбүлүкэтээҕи мобильнай биригээдэлэрин киинэ» бу күннэргэ Саха сирин оройуоннарыгар кытыы сытар, уустук суоллаах-иистээх нэһилиэнньэлээх пууннары хабан хаачыстыбалаах мэдиссиинэ көмөтүн оҥоро сылдьаллар. Бүгүн, олунньу 12 күнүгэр, биһиги улууспутугар Туойдаах нэһилиэгэр кэлэн үлэлээтилэр. Быраастар биригээдэлэригэр терапевт, кардиолог, акушер-гинеколог, офтальмолог, УЗД бырааһа, эндокринолог, травматолог-ортопед, невролог уонна педиатр исписэлиистэрэ бааллар. Үлэ сүнньүнэн олохтоох дьонтон анаалыс араас көрүҥүн ыллылар, ис уорганы УЗИ-лаатылар, ЭКГ түһэрдилэр уонна салгыы эмтэнэллэригэр сүбэ-ама биэрдилэр.
Маны таһынан, Сунтаардааҕы киин балыыһа быраастарын мобильнай биригээдэлэрэ эмиэ нэһилиэктэринэн сылдьан дьону-сэргэни көрүөхтэрэ-истиэхтэрэ. Ол курдук, олунньу 11 күнүттэн 14 күнүгэр дылы Дьаархан, Кэмпэндээйи, Бүлүчээн, Тэҥкэ нэһилиэктэригэр үлэлиэхтэрэ.
Елизавета ТИТОВА