Арассыыйаҕа «Дьиэ кэргэн» уонна Саха Өрөспүүбүлүкэтигэр «Оҕо саас сылын» чэрчитинэн, Саха сирин бастакы Бэрэсидьиэнэ М.Е. Николаевка аналлаах өрөспүүбүлүкэтээҕи дьиэ кэргэнинэн хоһоон ааҕыытыгар күрэс ыытылынна. Күрэс тэрийээччилэринэн, Хаҥалас улууһун Өктөмнөөҕү норуот тыйаатыра, А.С.Данилова аатынан «Барҕарыы» сынньалаҥ киинэ буоллулар. Бу, күрэс хоһоон нөҥүө оҕону патриотическай тыыҥҥа иитэр — үөрэтэр оҕо тылын сайыннарар, таһымын үрдэтэр, хоһоон нөҥүө Ийэ сиргэ, төрөөбүт дойдуга уонна тылга тапталы иҥэрэр сыаллаах ыытылынна.
Бастакы Бэрэсидьиэн Михаил Николаевка анаммыт айымньыларга, кини Саха сирин сайдарыгар улахан болҕомтотун ууран үлэлээн, үйэлээх, оспот суолу хаалларбытын, кэнэҕэски саха ыччата билэн-үөрэтэн, инникитин көлүөнэттэн көлүөнэҕэ саха норуотун улуу саарынын үтүө аата ааттана туруоҕа.
Сэтинньи 10 күнүгэр, күрэс түмүгүнэн Сунтаар нэһилиэгиттэн «Бастыҥ ааҕааччы» номинация кыайыылаахтарынан Петровтар дьиэ кэргэттэрэ буоллулар. А.П.Павлов аатынан Сунтаар 1-кы нүөмэрдээх орто оскуолатын 10 «а» кылааһын үөрэнээччитэ Иван Петров, ийэтэ Жанна Петрова, эдьиийэ Екатерина Понохова уонна эбэтэ Капитолина Белолюбская «Норуотун кэскилин түстээтэ» диэн Татьяна Сыроватская суруйбут хоһоонун ааҕыылара дьүүллүүр сүбэ үрдүк сыанабылын ылла. Хоһоон ааптара Татьяна Сыроватская Петровтар дьиэ кэргэннэригэр үтүө тыллардаах махталын тириэртэ.
Дьиэ кэргэнинэн сахалыы айымньылары ааҕыы — оҕоҕо төрөөбүт тылын эйгэтин сайыннарыы уонна иитии буолар. Төрөөбүт тыл — омук тыына, дьылҕата, сиртэн симэлийбэт соҕотох мэктиэтэ.
Александра Павлова (Николаева)