Саха Өрөспүүбүлүкэтин култууратын үтүөлээх үлэһитэ, Арассыыйа суруналыыстарын Сойууһун чилиэнэ Надежда Иванова култуура эйгэтигэр үлэлээбитэ 50 сылыгар аналлаах «Култуура эйгэтин бастыҥ уһуйааччыта» («Лучший наставник культуры») култуура эйгэтин идэтийбит үлэһиттэрин икки ардыларыгар өрөспүүбүлүкэтээҕи күөн күрэс үрдүк таһымнаахтык ыытылынна.
Манна биэс улуустан кэлэн култуура 10 үлэһитэ көхтөөхтүк кытынна. Ол курдук, Бүлүү, Чурапчы, Үөһээ-Бүлүү уонна Сунтаартан идэтийбит култуура үлэһиттэрэ 5 түһүмэххэ күөн күрэстэстилэр. Бу күрэскэ Сунтаартан С.А.Зверев аатынан норуот айымньытын кииниттэн В.Николаев аатынан норуодунай тыйаатыр салайааччыта Екатерина Григорьева уонна фольклорга исписэлиис Туяра Алексеева үрдүк ситиһиилэннилэр.
Күрэс чэрчитинэн, бэйэни билиһиннэрии, бырайыак көмүскээһинэ, талаан, бэриллибит сорудахха ыытааччы сорудаҕа уонна хоһоон ааҕыытын толорон көрдөрдүлэр. Күрэс түмүгэр дьүүллүүр сүбэ быһаарыытынан, кыттааччылар бары илии тутуурдаах, анал ааты ылан сүргэлэрэ көтөҕүлүннэ. Екатериналаах Туяра 4 анал ааты ылан бэлиэтэннилэр — «Лучший реализованный проект» диэни Екатерина Афанасьевна тутта уонна анал бирииһинэн наҕараадаланна. Маны сэргэ кини «Култуура эйгэтин бастыҥ уһуйааччыта» кылаан кыайыылаах ааты ылан, 50 тыһ. харчынан наҕараадаланна.
Эһиил бу күрэс кыайыылаахтар дойдуларыгар Олоҥхо Сунтаар сиригэр буолара былааннанар.
Сунтаардааҕы С.А.Зверев-Кыыл Уолун аатынан норуот айымньытын киинэ