Арассыыйа бэрэсидьиэнэ Владимир Путин көҕүлээбит «Доруобуйа харыстабыла» национальнай барыл иитинэн «Доруобуйа харыстабылын бастакы сүһүөҕүн саҥардыы» бырагыраамма көмөтүнэн, Элгээйи нэһилиэгэр 6 куойка миэстэлээх амбулаторнай балыыһа дьиэтэ, 2023 сыл атырдьах ыйыттан тутулла турар.
Эбийиэк бастакы көмүс сыбаайатын былырыын, атырдьах ыйыгар Ил Дархан Айсен Николаев Сунтаар улууһугар кэлэ сылдьан, үөрүүлээх быһыыга-майгыга түһэрбитэ. Балыыһа дьиэтэ уопсай үбэ 187 мөлүйүөн эбит буоллаҕына, быйыл эбийиэк сыаната үрдээн, 30 бырыһыан өрөспүүбүлүкэ бүдьүөтүттэн эбии үп көрүлүннэ. Онон уопсайа 244 мөлүйүөннээх толору хааччыллыылаах, аныгы ирдэбилгэ эппиэттиир, саҥа балыыһа тутулла турар.
Бэдэрээччигинэн Иван Сахаров салайааччылаах «Северо-Восток Стройдизайн» хааччахтаммыт эппиэтинэстээх уопсастыба ылсан үлэлии-хамсыы сылдьар. Үлэ хаамыыта төһө да графиктан кыратык хааллар, бу күннэргэ бэдэрээччик үлэтин тэтимирдэн, ситэри бириэмэтигэр бүтэриэхтэрэ. Билиҥҥи туругунан ититии ситимин уонна уотун холбооһунугар, ону сэргэ ис-тас үлэтигэр күүстээх үлэ бара турар. Саҥа амбулаторнай балыыһа быйыл ахсынньы ыйга түмүктэнэн үлэҕэ киириэхтээх. Балыыһа үлэһиттэрэ симиэнэҕэ 36 ыарыһаҕы көрөр буолуохтара. Уопсайа 15-тии кв.м. иэннээх 4 сытар палата, ол иһигэр биир изолятор хоһо баар буолуо. Аныгы кэм ирдэбилинэн муостата «теплый пол» буолан, тымныы кэмнэргэ көрдөрүнээччи дьон абыраныа этэ. Билигин балыыһа 28,5 штаттаах эбит, оттон саҥа эбийиэк үлэҕэ киирдэҕинэ эбии специалистэр эбиллиэхтэрэ. Олохтоох дьон улуус киинигэр киирэ сатаабакка, бу балыыһаҕа анализ туттарар уонна түмүгүн күнүнэн ылар кыахтаныахтара.
Елизавета ТИТОВА