Бүгүн Элгээйибит дьоллоох туонатыгар «Оһуор» култуура киинигэр нэһилиэк историятыгар киирэр үтүө күн тосхойдо. Ол курдук, өрөспүүбүлүкэ 15 нэһилиэгэр , ол иһигэр Сунтаар улууһугар икки нэһилиэккэ — Сиэйэҕэ уонна биһиги Элгээйибитигэр Саха сиригэр оҥоһуллубут «Экстра Синема» дойдутааҕы кинопрокат ситимин инновационнай биир улахан ситимэ «Оһуор» култуура киинигэр туруоруллан, үөрүүлээх аһыллыыта буолла. Бу киинэ саалатыгар1952 сылтан отучча сыл тымныыны-куйааһы, хаары-силлиэни аахсыбакка Элгээйи, Хоро, Харыйалаах, Элгээн, Күндэйэ дьонугар-сэргэтигэр киинэ көрдөрөн дьон ытыктабылын ылбыт, үтүө үлэһит Киһи, биир дойдулаахпыт, Саха АССР бастыҥ киинэ мэхээнньигэ, Элгээйи нэһилиэгин бочуоттаах олохтооҕо Липа Никандровна Кириллина аата иҥэриллэн, «ЛипаСинема» диэн ааттаах саҥа саалаланныбыт.
Нэһилиэк баһылыга Павел Григорьев бу үөрүүлээх, историческай суолталаах тэрээһиҥҥэ мустубут дьону-сэргэни бэлиэ күнүнэн эҕэрдэлээн туран, саҥа киинэ саалата Элгээйигэ аһылларыгар туох үлэ ыытыллыбытын сырдатта уонна Липа Никандровнаҕа олохтоох дьаһалта аатыттан Махтал суругу, сэмэй бэлэҕи туттарда. Ол кэннэ
саҥа проектордаах бастакы киинэ саалатын аалай кыһыл лиэнтэтин баһылык Павел Григорьев, «Оһуор» Култуура киинин директора Владимир Семенов уонна Липа Никандровна үөрүүлээх быһыыга-майгыга быстылар. Липа Никандровна ССРС саҕана 35 мм пленкаҕа көстөн кэлбит киинэ аныгы үйэҕэ саҥа цифровой технологияҕа көһөрөр эстафетатын туттаран, дистационнай салайыы кнопкатын баттаан, саҥа кэм экранын дохсун ытыс тыаһыгар доҕуһуоллатан түһэрдэ. Бу күн үөрүүтүн үллэстэн нэһилиэк дьаһалтата, «Астык» фирма салайааччыта Туйаара Иванова «ЛипаСинема» диэн суруктаах олус минньигэс торду бэлэх уунан, кэлбит дьон бары амсайан сурдээҕин астыннылар уонна махтаннылар. Бүгүн бүтүн Саха сирин үрдүнэн арыллар уон биэс «ЭкстраСинема» саалатын үөрүүлээх түгэннэрин Өрөспүүбүлүкэбит Ил Дархана видеоконференция нөҥүө эҕэрдэлээтэ, бу үтүө хамсааһыҥҥа махтал харда тылларын икки нэһилиэк саҥа киинэ саалатыттан Ил Дархаҥҥа тиэртилэр, ол иһигэр Элгээйи нэһилиэгиттэн «Оһуор» култуура киинин директора Владимир Семенов. Көрөөччүлэр аан бастакынан саҥа «ЛипаCinema” киинэ саалатыгар «Бүгүн Былыр» киинэни босхо көрдүлэр. Бу курдук нэһилиэк саҥа үйэни кытта бииргэ хардыылыыр, күн бүгүҥҥүттэн аныгы үйэ саҥа цифровой технологиятынан көрөөччүлэр дойдуга тахсар саҥа киинэлэри көрөн билиилэрин-көрүүлэрин хаҥатыахтара, сайдыахтара. Турбут киинэ проектордара биир кэлим автоматизированнай систиэмэҕэ уонна Пушкинскай картаҕа холбонуохтара. Саха ыччата оҥорбут саҥа бырайыага сайда-үүнэ, дьон-сэргэ махталын ыла турдун.
Татьяна СЕМЕНОВА, Элгээйитээҕи бибилэтиэкэ кылаабынай бибилэтиэкэрэ.
Ааптар хаартыскаҕа түһэриитэ.