От ыйын 11 күнүгэр, Москубаҕа, “Quattro Space” уораҕайыгар “Арассыыйа Почтата” 30 сыллаах үбүлүөйүн уонна Почта күнүн көрсө дойдубут бастыҥ үлэлээх почта үлэһиттэрин чиэстээтилэр. Бэлиэ тэрээһиҥҥэ Сахабыт сириттэн бастыҥ үлэлээх 4 почта үлэһитэ кытынна. Бастыҥнар кэккэлэригэр 2023 сыл түмүгүнэн Сунтаар улууһун Элгээйи нэһилиэгин почтатын үлэһитэ Нюргуяна Павлова почтаны хаачыстыбалаахтык тириэрдиигэ, үлэ соругун толорууга үрдүк көрдөрүүлэрин иһин, “Сыл бастыҥ почтальона” үрдүк ааты ылар чиэстэннэ. Киниэхэ үөрүүлээх быһыыга-майгыга кыайыылаах дипломун уонна Бочуотунай Грамотаны туттардылар. Нюргуяна Анатольевна 2 тыһ. кэриҥэ нэһилиэнньэлээх Элгээйи почтатыгар 10-с сылын почтальоннуур. Туһааннаах отделениеҕа начальник солбуйааччыта. Олохтоохтор аламаҕай, эйэҕэс кыыстарын Нюргуяналарын олус күндүтүк саныыллар, хаһыаты-сурунаалы тириэрдэрин күннэтэ күүтэллэр.
Биһиги бүгүн Нюргуянаны кытта сибээскэ тахсан кэпсэтэ сырыттыбыт.
– Арассыыйа таһымнаах үрдүк наҕарааданы тутан төһө долгуйдуҥ?
– Эрдэ бэс ыйыгар биллэрбиттэригэр олус соһуйбутум, үөрбүтүм. Саха сириттэн 4 буолан кэллибит. Кэллиэгэлэрим эмиэ Махтал суруктары, Бочуотунай грамоталары тутан үлэлэрэ сыаналаммытыттан олус диэн сүргэлэрэ көтөҕүлүннэ. Кэлэр-барар айаммытын, гостиницабытын барытын төлөөн сырытыннардылар.
– Дойду таһымнаах Почта үбүлүөйдээх тэрээһинэ хайдах ааста?
– Үөрүүлээх тэрээһин иннинэ бука барыбытын теплоходка олордон Москва өрүс устун экскурсиялаттылар. Спасскай монастыры, Муусука дьиэтин, Парящай муостаны, Улахан Кириэмил дыбарыаһын, Христос Спаситель храмын олус интэриэһинэйдик билиһиннэрэн кэпсээтилэр. Ол кэннэ “Quattro Space” диэн мунньахтыыр саалалардаах улахан дьиэҕэ сырытыннаран, манна эбиэттэтэн баран тэрээһин үөрүүлээх чааһыгар сырыттыбыт. “Почта России” АУо генеральнай дириэктэрэ Михаил Волков тыл этэн эҕэрдэлээтэ.
– Нюргуяна Анатольевна, кыһамньылаах үлэҥ үрдүктүк сыаналаммытынан өссө төгүл эҕэрдэлиибит, инники үлэҕэр ситиһиилэри баҕарабыт.
Саха сириттэн сылдьар почта үлэһиттэрэ
Арктика Почтамын начальнигын кытта
Витим почтальонун кытта
Марфа ИВАНОВА