Сунтаарбыт нэһилиэгэр автобус сырыыта саҕаланан оскуола үөрэнээччилэрэ кэлэллэригэр-баралларыгар абыраналлар. Онтон бу күннэргэ элбэх оҕолоох дьиэ кэргэн оҕолоро автобуһунан босхо сылдьарга билиэт тутан астыннылар. Бу СӨ тырааныспарын министиэристибэтин бирикээһинэн 1-кы кылаастан 11-с кылааска диэри оҕолор автобуһунан сылдьыахтара.
МАУ “Автотранспортное предприятие” тэрилтэ салайааччыта Елена Яковлева иһитиннэрбитинэн, улуус дьаһалтатын балаһыанньата үлэҕэ киирдэҕинэ автобуска төлөбүрү «Алмаасэргиэнбаан» тырааныспартнай каартатынан төлөһүөхтэрэ. Билигин терминаал сакаастанан кэлэрэ күүтүллэр, онуоха диэри оҕолор толуонунан сылдьаллар.
Алена ИВАНОВА