2022 с. үлэлиир «Экстра Синема» диэн өрөспүүбүлүкэтээҕи бырайыагынан былырыын 10 нэһилиэк киинэ саалаламмыта. Быйыл атырдьах ыйыгар куоҥкурус быһыытынан сүүмэрдэнэн, өрөспүүбүлүкэбит 17 култуура киинигэр киинэ көрдөрөр саалалар аһыллыбыттара. Бу күн СӨ Ил Дархана Айсен Николаев, “Экстра-синема” хампаанньа генеральнай дириэктэрэ үөрүүлээх, историяҕа хаалар бэлиэ тэрээһиҥҥэ ВКС нөҥүө холбонон, нэһилиэктэри бу дьоро түгэнинэн эҕэрдэлээбиттэрэ. Бу 17 нэһилиэк иһигэр Сунтаар улууһун икки нэһилиэгэр – Сиэйэҕэ уонна Элгээйигэ – бу Саха сиригэр оҥоһуллубут “Экстра Синема” анал установкалара туруоруллан, култуура кииннэрэ инновационнай киинэ прокатын платформатыгар холбоммуттара.
Күн бүгүн Элгээйитээҕи уонна Сиэйэтээҕи аныгы кэм киинэ саалаларыгар дьон эдэриттэн-эмэнигэр тиийэ киинэ көрөөрү тоҕуоруһа мустар. Үгүс олохтоох нэһилиэккэ бэйэтигэр саҥа киинэлэри улахан экраҥҥа көрөр кыахтаммыттарын үөрэ бэлиэтииллэр, социальнай ситимнэргэ санааларын суруйаллар.
Ольга Егорова, Сиэйэ олохтооҕо:
Кинотеатр үчүгэй ба5айы эбит. Куорат киэниттэн туох да итэҕэһэ суох тыаһа-ууһа эҥин иһиллэр эбит. Дьэ абыраныыьыкпыт. Эбии попкорн эрэ наада эбит
Ия Павлова:
– Биһиги эмиэ кинотеатры олус астынан киирдибит. Куораттан туох да уратыта суох. Инники өттүгэр өссө сайда турдун, киинэни сэргээччи өрүү баар буоллун, элбии турдун.
Анна Иванова, Элгээйи олохтооҕо:
Балаҕан ыйын 23 күнүгэр Элгээйи нэһилиэгэр “Липа-Cinema” саалатыгар «Лоокуут уонна Ньургуһун» киинэни дьиэ-кэргэнинэн көрдүбүт. Уйбаан Нуолур аатынан Элгээйитээҕи модельнай библиотека ыыппыт викторинатыгар кыайан, биир билиэти босхо ыламмыт үөрдүбүт. Киинэни олус сөбүлээтибит. Нэһилиэкпитигэр “Экстра-Синема” киирэн, Дьокуускайы кытта тэҥҥэ премьера көрөр наһаа үчүгэй. Аттынааҕы нэһилиэктэртэн эмиэ киирэн көрөллөр.
“Сунтаар сонуннара” хаһыат.