Аҕа дойду Улуу сэриитин кыттыылааҕа, снайпер Егор Константинович Петров аатын үйэтитэр сыаллаах атырдьах ыйын 7 күнүгэр Дьокуускай куоракка “Патриот” кулууп базатыгар буулдьанан ытыыга бэтэрээннэргэ уонна ыччакка күрэх ыытылынна. Манна 13 улуус бэргэн ытааччылара 4 көрүҥҥэ күрэхтэстилэр. Хамаанданан күрэхтэһиигэ 1 үрдэл Мэҥэ- Хаҥалас Төҥүлү нэһилиэгин хамаандата, 2 үрдэл Хаҥалас улууһун хамаандата, 3 үрдэл Орто Халыма улууһун хамаандата буоллулар. Онтон “СОУ” эрчиллиигэ 36 киһи кыттыбытыттан 1 үрдэли “Патриот” кулууп чилиэнэ Николай Григорьев, 2 үрдэли Валерий Григорьев ХИФУ, 3 үрдэли Өлүөхүмэттэн Надежда Егорова ыллылар. “Снайпер 4” эрчиллиигэ 33 ытааччыттан 1 үрдэл Сунтаартан Константа Егорова, 2 үрдэл Алдантан Арсен Дуранов, 3 үрдэл Уус Дьааҥыттан Айал Захаров буоллулар. “Бэргэн” эрчиллиигэ 27 спортсмен кыттыбытыттан 1 үрдэл “Патриот” кулууп чилиэнэ Николай Григорьев, 2 үрдэл Дьааҥыттан Павел Чириков, 3 үрдэл ХИФУ хамаандатыттан Валерий Григорьев кыайыы өрөгөйүн биллилэр.
Снайпер-пулеметчик Е.К. Петров эрчиллиитигэр анал бириис иһин 16 кыттааччы биирдиилээн бастыыр иһин күөн көрүстүлэр. Куокуну нэһилиэгэ туруорбут 30 тыһ.солк. сертификатын “Бастыҥ снайпер” күрэх муҥутуур кыайыылааҕын ааты Сунтаар Хаданыттан төрүттээх Николай Григорьев ылла, кини кэнниттэн аҕыйах очконан хаалбыт ХИФУ устудьуона Валерий Григорьев, Е.К.Петров аймахтарын туруорбут харчынан бирииһин тутта, онтон тилэх баттаһа Куокуну эрэллээх ыччата, буулдьанан ытыыга маастар Сергей Степанов үчүгэй көрдөрүүлэнэн, аймахтар анал бириистэрин тутан үөрүү көтөллөннүлэр.
Куокуну агрооскуолата туруорбут анал бирииһин “Эдэр кыттааччы” Дамир Чирков (Хаҥалас улууһа) ылла.
Ону тэҥэ, снайпер сиэннэрэ бу күрэххэ кыттан Ганя Акимов, Ньургуйаана Федорова харчынан бириэмийэлэннилэр. Артур Акимов “Охотобщество” туруорбут анал бирииһин тутта.
Аймахтар анал бириистэрин Анжелла Винокуроваҕа (Орто Халыма улууһа), Таисия Ксенофонтоваҕа(Сунтаар), Юрий Уаровка (Уһун –Күөл нэһ., Сунтаар) уонна Сунтаар 1 нүөмэрдээх хамаандаҕа туттардылар.
Тэрийээччилэр уонна Е.К.Петров аймахтара күрэҕи тэрийсибит уонна үбүнэн көмөлөспүт дьоҥҥо махталларын биллэрэллэр.
Антонина КИРИЛЛИНА- Е.Петров сиэнэ
