2012 сылтан медиктэр тыа сиригэр үлэлии баралларын угуйар сыаллаах «Земскэй доктор» судаарыстыбаннай бырагыраама үлэлээн саҕалаабыта. Бастаан утаа бу бырагыраамаҕа быраастар эрэ хабыллар буоллахтарына, 2015 с. орто сүһүөх медперсоналга «Земскэй биэлсэр» диэн бырагыраама баар буолбута.
2019 с. Арассыыйа бэрэсидьиэнэ Владимир Путин РФ бырабыыталыстыбатыгар «Земскэй доктор» уонна «Сельскэй учуутал» бырагыраамаларынан Уһук Илиҥҥэ үлэлиир быраастарга уонна педагогтарга көрүллэр биир кэмнээх төлөбүрү икки төгүл улаатыннарар туһунан соруйбута. Билигин тыа сирин каадырынан хааччыйыы боппуруоһун быһаарыыга маннык хабааннаах бырагыраамалар көдьүүстээхтэрэ көһүннэ диэн этэр кыахтаахпыт.
Сунтаардааҕы киин балыыһа 500-тэн тахса үлэһиттээх өрөспүүбүлүкэ биир улахан оройуоннааҕы балыыһата буолар. Манна араас хайысхалаах анал стационардар, күнүскү стационардар, суһал көмө отделениета, клиническэй-диагностикалыыр лабораториялар, рентгенология отделениета, 10 быраас амбулаторията, 15 биэлсэр-акушер пууна киирэллэр.
2012 с.бэттэх “Земскэй доктор”, “Земскэй биэлсэр” бырагырааманан 5 сыл үлэлииргэ дуогабардаһан элбэх эдэр үлэһит кэлэн үлэлиир.
Быйыл 2023 с. 11 ый устата улууспут балыыһаларыгар уопсайа 18 саҥа исписэлиис үлэлии кэлбит.
Ксенья Иванова, Сунтаардааҕы
киин балыыһа ыарыыны эрдэттэн
сэрэтэр кэбиниэт сиэстэрэтэ:
— “Тыа сирин биэлсэрэ” бырагыраама чэрчитинэн быйыл 1 исписэлиис ананан кэллэ. Анастасия Борисова Куокуну ФАП-ыгар сэбиэдиссэйинэн ананан үлэтин саҕалаата.
Ахсынньы 1 күнүгэр үөрүүлээх быһыыга- майгыга саҥа кэлбит исписэлиистэри чиэстээһин буолбута.
Эдэр үлэһиттэргэ улуустааҕы ыччат бэлиитикэтин салайааччытын солбуйааччы Николай Лидочен, киин балыыһа салайааччылара, профком бэрэссэдээтэлэ эҕэрдэлээтилэр, ыччаты долгутар ыйытыыларга хоруйдаатылар.
Эдэр исписэлиистэр бэйэ-бэйэлэрин кытта билсистилэр, санааларын үллэһиннилэр. Саҥа исписэлиистэрбитигэр төрөөбүт улууспут доруобуйа харыстабылын сайдыытыгар кылааккытын киллэрэр ыра санааҕыт туоларыгар баҕарабыт!
«Сунтаар сонуннара» хаһыат.